Work stoppage giisyu sa DOLE sa giayo nga simbahan

CEBU, Philippines – Ang Department of Labor and Employment (DOLE)-7 nipagawas og stoppage order sa gitrabaho nga Our Lady of Sacred Heart Parish sa dalan Escario, Barangay Kamputhaw ning siyudad.

Kini human ilang nakita nga daghang mga labor code violations nga nalapas ang Vineyard Construction nga maoy gitrabahoan sa duha ka trabahanteng nangatagak samtang nag-masilyas sa kisame sa miaging semana ug nangalandig sa tambalanan.

Matud ni DOLE-7 Regional Director, Exequiel Sarcauga, moabot sa 14 ka violations ang nahimo sa maong kontraktor.

Pipila niini mao ang wala pagpakita og Philippine Contractors Accreditation Board (PCAB) license, walay structural design ang scaffoldings nga gigamit, walay construction safety and health program, walay safety practitioner  and certified first aider.

Susihon pa usab nila kun ang kontraktor nakasunod sa general labor standard.

Human sa pagkatagak sa mga trabahanteng sila si Junjie Cañete ug Mark Gil Gerodia naghimo sila niadtong  Biyernes og mandatory conference ug gituki ang ilang nakitang mga kalapasan.

Sigon pa ni Sarcauga, kagahapong adlawa misaad ang kontraktor nga mosumitir sa mga gipangayong rekisitos.

Kun ang ahensiya wala nay makita nga gitawag og imminent danger ug duna nay structural analysis sa scaffoldings, ayha pa mopagawas ang DOLE og conditional lifting sa stoppage order hangtod nga makompleto ang ubang rekisitos nga gipangayo.

Matud pa ni Sarcauga, base sa Bureau of Working Condition niadtong buwan sa Marso karong tuiga, ang rehiyon maoy ikaduha sa National Capital Region nga labing daghan og nagpadayong gitukod nga mga buildings.

Apan giangkon ni Sarcauga nga maglabad gyud ang ilang ulo aning ubang mga trabahante kay gawas nga gahi og ulo, dili maminaw ug dili mosunod sa mga safety measures bisan pa man og gihatagan na sila og mga safety gear aron likay sa disgrasya.

Gihangyo karon sa ahensiya dili lang sa mga trabahante apan lakip na usab sa mga construction companies angay hinumduman ang disgrasya dili mamili og tawo maong kinahanglan nga ang tanan magpakabana. – /EIM) (BANAT NEWS)