Mga barangay naglisud pagkwenta sa nahatag kanila
CEBU, Philippines - Ang 16 ka barangay dinhi sa dakbayan sa Sugbo dili pa gihapon mahatagan sa ilang financial assistance nga tag P5 milyones kay wala pa gihapon makahatag og kwentada sa nadawat nila sa nangaging tuig.
Si Mayor Michael Rama mipasabot nga wala siya’y pilion, bisan pa og iyang mga kaalyado ang mga kapitan sa barangay, dili gihapon pahatagan kun wala makakompleto sa ilang liquidation report.
Ang mga barangay kapitan hinuon mipasalig nga paninguhaon nila nga masumiter dayon ang gikinahanglang mga dukomento.
Napulo sa maong mga barangay anaa sa north district ug ang unom sa south district.
Matud ni Rama nga gihatagan niya hangtod sa December 15 ang mga barangay nga wala pa makahatag sa liquidation aron ma-release na ang ilang financial aids.
Ang mga barangay mao ang Banilad, Capitol Site, Cogon Ramos, Day-as, Lahug, San Roque, Tejero, Kasambagan, Zapatera,Talamban, Bulacao, Guadalupe, Labangon, Quiot Pardo, Kinasang-an, Buhisan, Capitol, Cogon Ramos, Day-as, Lahug, Kasambagan, Buhisan ug Quiot. (Sheriza Mae R. Uy/RUB)(BANAT NEWS)
- Latest
