Ginikanan sa laing bata nga namatay sa MDH nidangop sa Ombudsman
CEBU, Philippines - Midangop kagahapon sa buntag sa Visayas Ombudsman ang ginikanan sa 4-anyos nga si Jencent Kaa Tuballa kinsa namatay diha sa Minglanilla District Hospital tungod sa pagtuong nagpasagad ang hospital staff sa ilang anak.
Matud pa ni Gerard Vincent Tuballa, amahan sa bata, unang lakang pa nila ang pagdangop sa buhatan sa Visayas Ombudsman, aron sa pagpakisayod kung unsay angayan nilang buhaton aron mahatagan og hustisya ang kamatayon sa bugtong nilang anak.
Sumala pa ni Tuballa, aduna gayud silay nakitang lapso sa gihimo sa doktor, kinsa wala motukma ang gigamit sa doktor ngadto sa bata kinsa nagkalibanga apan gihatagan kini og Salbutamol nga tambal.
Nibutyag ang amahan nga hangtud karon dili nila madawat sa iyang asawa ang kamatayon sa ilang anak, gumikan sa pagpasagad sa mga hingtungdan.
Apan ang pangulo sa Provincial Health Office Dr. Cynthia Genosolango, nibutyag nga hangtod karon nagpaabot pa siya nga maestorya ang magtiayong Tuballa aron makuhaan sa ilang pamahayag. (Rowena D. Capistrano/EIM)(BANAT NEWS)
- Latest
