IEC Pavillion nahuman na gyud

CEBU, Philippines - Gamay na lang gyud ang kuwang ug makompleto na sa pagkahuman ang gitukod nga International Eucharistic Pavilion ug gani gikatakda na kini nga itugyan na sa kontraktor ngadto sa Archdiocese of Cebu karong Sabado.

Ang IEC Pavilion maoy venue alang sa 51st International Eucharistic Congress nga ipahigayon sa Enero 24 ngadto sa 31 sunod tuig.

Human sa 15 ka buwan, magamit na gyud ang P500 milyones nga IEC Pavilion diin sa pagka karon finishing touches na lang ang gipanghimo sa mga trabahante sa Duros Construction Corporation.

Atol sa gipahigayon nga inspection sa media kagahapon sa buntag gipakita sa kontraktor ang kinatibuk-an nga sulod sa Pavilion.

Gipasabot ni Architect Carlos Zafra, nga 12 mil lang ka tawo ang total capacity sa Pavilion kay gipangbutangan man og mga agianan ang dapit aron maseguro ang kaluwasan ug kaharohay sa mga delegado.

May kapilya sab sulod sa Pavilion nga mosulod og 200 ka tawo.

Gibutangan usab og access alang sa mga persons with disability nga buot moapil ug motambong sa kalihukan sa IEC. Ang IEC Pavilion adunay 27 ka CCTV camera nga giinstalar ug aduna kini 200 ka parking slots.  (BANAT NEWS)