Nanulis gamit ang toy gun nakulatahan
CEBU, Philippines - Maayong pagkagisi sa ngabil sa usa ka tulisan human kini nakulatahan sa drayber sa taxi nga iya untang tulison gamit ang toy gun diha sa Leon Kilat Street ning Dakbayan sa Sugbo.
Ang suspetsado mao si Raulito Guingoyon, 32, taga Barili samtang ang drayber sa taxi mao si Armand Apostro, 37, nagmaneho sa Marmic taxi.
Matud pa ni Police Officer 2 Mario Nator ang desk officer sa Carbon Police nga nahinabi sa Banat News samtang nangita og pasahero si Apostro sa maong dapit miduol ang suspetsado kauban ang laing lalaki nga nagpatuo nga mosakay.
Apan si Guingoyon ang kalit lang misulod sa taxi dayong tion sa iyang dala nga “kalibre .45 pistola” ug mideklarar nga tulis, apan nakabantay ang biktima nga toy gun ra diay kadto hinungdan nga iya kining gihawiran ug nahitabo ang komosyon.
Ang kauban ni Guingoyon misutoy og dagan pagkakitang nisukol ang drayber. Demalas ang suspek kay ang drayber dako pa niya og lawas ug makamaong mangamot hinungdan nga nakulatahan kini og mayao.
Sa pagrekisa sa mga polis nakuhaan usab og drug paraphernalia si Guingoyon. (BANAT NEWS)
- Latest
