Election protest ni Tommy vs Mike gidismis
CEBU, Philippines - Gi-dismiss na sa Commission on Elections ang election protest nga gipasaka ni kanhi mayor Tomas R. Osmeña batok ni Mayor Michael Rama nga mipilde kaniya sa piniliay kaniadtong 2013.
Si Osmeña gipilde ni Rama sa labaw nga 6,367 botos human siya mikuha og 218,632 botos, samtang si Osmeña nakakuha lang og 212,265 botos.
Mapasalamaton kaayo si Rama sa hukom sa Comelec apan si Osmeña wala na masurpresa tungod kay gisibog na niya ang protesta sa miaging Hunyo kay natan-aw niya nga apiki na ang panahon.
Matud ni Osmeña nga magsangka na lang sila pag-usab si Rama sa eleksyon pagka mayor dinhi sa dakbayan sa Sugbo karong sunod tuig.
Si Comelec Commissioner Christian Robert Lim mipasabot nga sa 6,367 nga labaw’ng botos ni Rama, angay unta nga si Osmeña makakuha og 1,274 botos nga adto mopabor kaniya atol sa paghusay sa election protest.
Gibutyag ni Lim nga aduna lay 121 ka botos nga para kang Rama nga giprotestahan sa mga abogado ni Osmeña ug nagpasabot nga kinahanglan pa siya nga mo-recover og 1,153 votes.
Nahibaw-an nga kaniadtong buwan sa Hunyo, si Osmeña mihukom nga kuhaon na lang ang gibutang nila nga “cash bond” didto sa Comelec ug dili na lang ipadayon ang recounting kay natan-aw ni Osmeña nga wala nay kapuslanan kun mopadayon siya pagprotesta kay eleksyon na sab. Si Osmeña ug Rama managkauban kaniadto sa Bando Osmeña Pundok Kauswagan apan si Rama mibuwag sa BOPK diha nga nahimo na siya nga mayor human sa pagsuporta ni Osmeña kaniya.
Ang “rematch” tali kanila ni Osmeña ug Rama atol sa eleksyon sunod tuig gihulagway nga kulba-hinam kaayo kay kini maoy sukdanan kun kinsa gayud kanila ang mas gamhanan. (BANAT NEWS)
- Latest
