Davide, mga opisyal gikiha tungod sa CICC

CEBU, Philippines - Mga opisyal sa Kapitolyo gireklamo sa usa ka abogado ngadto sa Deputy Ombudsman-Visayas kagahapon sa buntag tungod sa wala nila pag-atiman sa Cebu International Convention Center (CICC).

Si Atty. Ervin Estandarte, residente sa Barangay Pagsabungan, dakbayan sa Mandaue mipasaka og kasong kriminal ug administratiba batok kang Gob. Hilario Davide, III ug sa mga sakop sa Hunta Probinsiyal.

Sa iyang affidavit, si Estandarte nagkanayon nga ang mga opisyal sa probinsiya nakalapas sa Section 3 (e) sa Akta Republika 3019 kon “Anti-Graft and Corrupt Practices Act” tungod kay nakahatag kini og undue injury sa kagamhanan sa probinsiya, dakbayan sa Mandaue ug sa katawhan sa Sugbo.

Gawas niini, ang opisyal sa probinsiya giingong nakalapas usab sa Civil Service Law (Presidential Decree no. 807) ug Code of Conduct of Public Officers and Employees (R.A. 6713) tungod sa wala pag-atiman sa CICC hinungdan nga gianam na og kaon sa taya ang mga puthaw sa edipisyo ug ang mga pasilidad niini ug furniture nagkaanam-anam na usab og kaguba ug dili na mapuslan.

Si Estandarte nagkanayon nga usa siya ka residente sa dakbayan sa Mandaue ug wala siya’y kalabutan sa politika.

Matag jogging niya diha sa palibot sa CICC makita niya ang maong guba nga edipisyo ug delikado sa publiko tungod kay posibleng mangatagak ang mga nadugta na nga dapat niini.

Dugang ni Estandarte nga buot niyang mahatagan og pagtagad ang CICC ug mapaayo kini aron mapuslan sa katawhan.

Si Bokal Grecilda Sanchez nagkanayon nga wala pa sila makadawat og kopya sa reklamo, apan siya miklaro nga ang CICC ebidensya sa kaso sa kurapsiyon.

Ang gipasabot niya mao ang kaso batok kang kanhi gobernador ug karon Kongresista Gwendolyn Garcia.

Si Bokal Jude Thaddeus Sybico, sa iyang bahin nagkanayon nga wala pa sila’y mahimo sa CICC tungod kay duna pa kini kaso karon ug di nila kini mahilabtan hangtud nga wala’y desisyong ipagawas ang korte unsay angay buhaton niini.

 “Right now, we cannot touch it, and regarding the court case, I think that goes with the job, being in public office you’ve got to be ready to get sued,” ni Sybico pa.

Samtang si Bokal Miguel Magpale nagkanayon nga basahon pa nila ang unod sa kaso nga gipasaka batok kanila ni Estandarte. (BANAT NEWS)