APEC leaders nangabot na

CEBU, Philippines – Nag-abot-abot na ang mga nagkadaiyang lider sa mga nasud nga sakop sa Asia Pacific Economic Cooperation (APEC) didto sa kaulohan ug nasentro ang atensyon sa mga lider sa duha ka gamhanang nasud, ang Amerika ug China.

Si US President Barack Obama miabot kagahapon luwan sa Airforce One ug human sa pag-abi-abi sa mga opisyal sa Pilipinas midiretso kini og sakay sa Marine One helicopter padung sa iyang opisyal nga mga lakaw lakip na ang pagbisita sa BRP Gregorio del Pilar, ang kanhi US Coast Guard Cutter Hamilton Cutter nga gihatag sa Amerika sa Pilipinas.

Lakip sa niabot si Chinese President Xi Jinping kinsa malaumon nga magmalambuon ang Asya-Pasipiko nunot niining bag-ong panagtigom sa mga lider sa mga nasud nga sakop sa APEC.

Miabot usab si Australian Prime Minister Malcom Turnbull  ingon man si South Korean President Park Geun-Hye   kinsa parehas ni Obama gikan pa nitambong sa G-20 Leaders’ Summit sa Antalya, Turkey.

Samtang si Mexican President Enrique Peña Nieto una nang niabot dinhi alang gihapon sa maong tigom niadto pang Lunes.

Niabot usab si Canadian Prime Minister Justin Pierre James Trudeau ingon man si New Zealand Prime Minister John Key.

Subling nitungtong sa Pilipinas si Malaysian Prime Minister Najib Razak kinsa kataposang nakaduaw sa Pilipinas atol sa pinirmahay sa kasabotan tali sa mga rebeldeng Muslim ug sa gobiyerno kapin usa ka tuig na ang nilabay.

Miabot usab si Vietnamese President Truong Tan Sang kinsa nakigsabot sa Pilipinas isip strategic partners sa giatubang sa duha ka nasud nga problema sa West Philippine Sea batok sa China.

Hasta ang lider sa Hong Kong nga si Leung Chun-Ying miabot usab aron motambong sa meeting, ingon man si Japanese Prime Minister Shinzo Abe kinsa nisaad atol sa panagtigom tali sa mga opisyal sa Pilipinas nga motabang aron mapalig-on ang pwersa militar sa nasud ilabi na sa natad sa maritime security.

Ang mga lider una nang mipahibalo nga mopagawas og pamahayag nga nagkondenar sa pagatake didto sa Paris, France.

Samtang si Colombian President Juan Manuel Santos kinsa miabot niadto pang Lunes isip observer sa APEC Summit nakighimamat kang Presidente Benigno Aquino III alang sa usa ka bilateral meeting ug gituki ang problema ug kun unsaon pagbuntog sa ilegal nga drugas.

Miabot usab si Papua New Guinea Prime Minister Peter Charles Paire O’Neill lakip na si kanhi Taiwanese Vice President Vincent Siew, isip special envoy ni President Ma Ying-jeou.

Ang mga lider sa mga nanambong nga mga nasud lakip ang ilang mga negosyante nga nanambong taas kaayo ang pangagpas sa paglambo sa Asia-Pacific region apan niangkon sila nga dako kaayong hagit kanila nga ang maong kalamboan matagamtaman sa tanan ilabi na sa mga kabus.

Ang mga business leaders  sa APEC taas kaayo ang panglantaw sa ekonomiya sa Pilipinas nga mosaka base kini sa APEC Chief Executive Officer Survey.(Gikan sa Wires/EIM) (BANAT NEWS)