50 balay naugdaw

CEBU, Philippines – Mukabat ngadto sa 50 ka balay ang nasunog kagahapon sa buntag sa Sitio Abaya ug Puntod, Alaska-Barangay Mambaling ning Dakbayan sa Sugbo.

Matud pa ni Fire Marshal Chief Inspector Rogelio Bongabong, ang alarma nadawat alas-9:26 ug nakontrolar alas-10:10 sa buntag human naisa ngadto sa 2nd alarm.

Gisusi karon ang impormasyon nga nagsugod kini sa panimalay ni Filomena Socatre o ba kaha sa balay sa usa ka Linda Campaner base usab sa impormasyon gikan ni Senior Fire Officer 4 Roylim Maratas. Ang kalayo daling mitapon sa  45 ka panimalay nga hingpit naugdaw ug lima ang nakan-an nga pulos ginama sa light materials. Gibana-banang P500 mil ang danyos sa maong sunog. Gibutyag ni Bongabong nga naglisod sila pagsulod sa lugar tungod kay hagip-ot kaayo ang agianan ug daghan kaayo ang tawo nga nakaali sa agianan.

Samtang kusog usab kaayo ang huros sa hangin maong daghan kaayo ang nasunog nga mga balay. Duha ka tawo ang naangol mao sila si Ruben Zapanta human natagakan og kahoy ang ulo niini ug si Filomena nga nakaangkon og hilos sa nawong.

Apan si Socatre dili motuong gikan sa ilang balay ang sunog kay base sa pamahayag sa iyang umagad diha kini nagsugod sa likod sa ilang balay apan dako na ang kalayo.

Base sa talaan sa Department of Social Welfare and Services, 48 ka pamilya ang house sharer, 26 ka pamilya ang nag-abang ug tanan mikabat og 122 ka pamilya ang kinatibuk-ang naapektahan sa maong sunog. Gibutyag ni Portia Basmayor sa DSWS,  gisubay nila karon kinsa ang tinud-anay nga mga biktima aron kadto lamang angayang makadawat maoy ilang mahatagan og hinabang.

Si Barangay Kapitan Wilfredo Go, nibutyag nga magpahigayon sila og emergency meeting aron  pagdeklarar og state of emergency aron magamit ilang calamity fund pagpamalit sa gikinahanglan sa mga nasunogan.

Si Atty. Collin Russel ang pangulo sa Division for the Welfare of the Urban Poor, nibutyag nga ilang tan-awon kun kinahanglang irekomendar ang pag-reblocking sa lugar.

Si Harold Alcontin ang North District Coordinator sa Quick Response Team, miingon nga sa Alaska Elementary School ipahimutang ang mga nasunogan samtang gipaabot pa ang rekomendasyon pagpabalik kanila.

Ang prinsipal sa tunghaan nga si Cerelina Llerin, nitug-an sa Banat News, bukas ang ilang tulonghaan para sa mga nasunugan ug mopahigayon na lang sila og emergency class sa grade 4 kansang napulo ka mga lawak-saringan maoy butangan sa mga biktima.

Awhag ni Llerin sa mga nasunogan nga dili lang pasipad-an ang ilang tulonghaan ilabi na nga ila gihapong mga anak ang nagtungha sa maong eskwelahan. – /EIM) (BANAT NEWS)