Illegal swertres booths pangsirad-an

CEBU, Philippines – Gipasalig ni Supt. Germano Mallari, hepe sa kapolisan sa Siyudad sa Talisay nga ila’ng pangsirad-an ang mga booths nga namaligya og illegal swertres sa siyudad.

Apan ang kapolisan nangayo og tabang sa mga opisyal sa barangay sa dili pa mohimo sa operasyon.

Matud ni Mallari nga ilang plantsahon ang operasyun aron sikop gyud ang tanang nalambigit sa ilegal nga kalihukan.

"Ngayo gyud mi og tabang nila’ng mga opisyales kay sila man ang nasuhito gyud sa ila’ng mga barangay," matud ni Mallari.

Si Kapitan Raul Cabañero sa Barangay Bulacao ug presidente sa Association of Barangay Councils nipahigayon og special meeting sa nilabay’ng semana gumikan sa nagkagrabe nga illegal swertres nga booth nga makita lang daplin sa karsada.

Si Cabañero nibutyag nga political will ang kinahanglan aron masumpo ang kalihukan.

Atol sa special meeting nga gipatawag ni Cabañero, pakyas sa pagtungha si Mayor Johnny de los Reyes ug chairman sa committee on peace and order nga si Konsehal Valeriano Ylanan hinungdan sa iya’ng kahiubos.

Gani ang mga kapitan nihulagway nga nigara ang mga operators sa rason nga sila ang naghatagan sa mga polis.

Si Mallari nagkanayon nga mahimo’ng ipadangat sa mga opisyales ang ila’ng sumbong pinaagi sa pag-ila sa mga polis nga nagdawatan og kwarta sa operators sa illegal swertres tungod kay dili kini pwede sa ila’ng profession.

Nihangyo si Mallari sa mga opisyal sa barangay nga unta sila tabangan sa ipahigayon nga operasyon tungod kay daghan sila og  gipang-follow-up nga kaso. – /GMR) (BANAT NEWS)