Tabang ni Cayetano gipalapdan
CEBU, Philippines – Mokabat na sa P2 milyones ang napangapod-apod ni Senador Allan Peter Cayetano gikan sa kaugalingong kwarta alang sa Tabang Project, usa ka health program sa mga kabus nga malandig sa Vicente Sotto Memorial Medical Center.
Ang "Tabang ni Alan Cayetano" Medical Assistance Program wala’y gipili nga pasyente basta ma-admit sa VSMMC nga usa ka pangpubliko’ng tambalanan. Moabot na sa 2,467 ka pasyente sa Rehiyon 7 ang naka-benepisyo sa programa.
Usa niini si Crislinda Bagol, 59-anyos, nga taga Siyudad sa Carcar, adunay breast cancer ug gipaubos sa sunod-sunod nga chemotherapy.
Ang tabang ni Cayetano maghatag og pinansiyal nga tabang alang sa pagpapalit og tambal o kaha alang sa bayranan sa hospital.
Gipahibawo ni Cayetano nga gipalapdan sab niya ang serbisyo ngadto sa Negros Oriental, Misamis Occidental, Misamis Oriental, Agusan del Norte, Surigao del Norte, Zamboanga del Norte, Bohol, Siquijor ug Leyte.
Gipasalig ni Cayetano nga sama ni Bagol nga nangandoy nga makakita og kadasig pag-atubang sa iya’ng sakit ug uban pa’ng mga pasyente nga nawad-an na og paglaum, magpadayon ang Tabang Project alang sa mga kabus. – /GMR) (BANAT NEWS)
- Latest
