2 construction workers nagpusil, nanunggab
CEBU, Philippines – Nagpusil sa iya’ng ulo ang usa ka construction worker pasado alas 12 sa niagi’ng udto sa El Pardo, Boljoon.
Wala na’y kinabuhi nga naabtan sa mga sakop sa Boljoon Police Station si Lucrecio Sestoso, 47, nga naligo sa dugo sulod sa iya’ng kwarto.
Base sa imbestigasyon nga samtang malipayon nga naniudto ang iya’ng mga ginikanan ug igsuon, kalit lang nakadungog og lanug nga buto gikan sa kwarto sa namatay.
Gisusi nila ug nakurat na lang sila nga patay si Sestoso nga nagbuy-od ug nagkadugo ug may samad pinusilan sa wala’ng bahin sa ulo ibabaw sa iya’ng wala’ng dunggan.
Sa wala pa naghikog si Sestoso nabantayan nga kanunay kini’ng nagminghoy ug wala na kaayo magtagad sa iya’ng trabaho.
Samtang laing construction worker ang nanunggab human napikon sa komedya sa kauban sa trabaho sa Barangay Mactan, Dakbayan sa Lapu-Lapu sa niagi’ng Biyernes sa gabii.
Matud ni PO2 Marvin Saraum, imbestigador sa Lapu-Lapu City Police Office - Homicide Section, nga si Ruel Turalba, 35, lumad nga taga Anda, Bohol, nga nasuko sa komedya sa iya‘ng kauban sa trabaho nga si Mario Romano, 44, taga Loon, Bohol.
Nakaangkon og samad dinunggaban sa wala’ng siko si Romano ug dali nga gidala sa Lapu-Lapu City Hospital samtang dali’ng nakaikyas sa krimen si Turalba. (BANAT NEWS)
- Latest
