Wa kabayad sa drugas duha ang gipatay

CEBU, Philippines – Patay ang usa ka 43-anyos nga lalaki nga gipusil atubangan sa iyang 14-anyos nga uyab human kini giingong nakalalis ang iyang katransaksyon mahitungod sa drugas diha sa Barangay San Nicolas Proper ning Dakbayan sa Sugbo niadtong miaging gabii.

Ang namatay mao si Leonardo Gesmen, nga taga 251 B. Katipunan St. Salvador sa Barangay Labangon human kini makaangkon og samad pinusilan sa iyang ulo.

Matud ni Police Officer 3 Cristobal Geronimo nga sa ilang pagpakighinabi sa 14-anyos nga uyab niini, kini mitug-an nga ang ilang tuyo sa pag-adto sa maong lugar mga alas 9:45 sa Biyernes sa gabii mao ang pagkuha og stocks sa ilegal nga drugas.

Usa ka ginganlan og Marlon ang pirme nga kasabot ni Gesmen nga kuhaan og drugas nga mobalor og P55 mil, apan gikatahong dunay  laing tawo nga nagsul-ob og yellow nga t-shirt ug maong nga purol ang gipadala aron sa pagkuha sa kwarta ug mihatud sa drugas.

Apan matud pa, nagkalalis ang duha human P15, 500 lamang ang gidala ni Gesmen. Tunga-tunga sa ilang panaglalis, duha ka tawo nga nagsakay og motorsiklo ang kalit lang miabot ug mialirong kang Gesmen dayon pusil niini. Matud ni Geronimo nga gikuha pa sa tulo ka mga mamumuno ang P15,500 sa biktima usa misibat sakay sa usa ka motor. 

Samtang patay usab ang usa ka gidudahang pusher human gipusil sa iyang ‘supplier’ niini diha sa lungsod sa San Francisco sa isla sa Camotes.

Apan nakasulti pa ang biktimang si Arnel Formentera, 36, taga Esperanza, San Francisco kun si kinsa ang mipusil kaniya ug namatay kini 20-minutos samtang giatiman siya sa mga doktor sa Ricardo Maningo Memorial Hospital.

Ang gitudlo sa biktima nga mipusil kaniya sa wa pa ni mabugto-i sa iyang kinabuhi mao ang usa ka Alex Otida.

Sumala pa ni Police Officer 1 Rolie Arenas, desk officer sa San Francisco Police Station nga nakadagan pa sa karsada ang biktima human gipusil ni Otida diha sa kubol-kubol niini sa Barangay Esperanza.

Tayming nga adunay mga polis sa tambalanan niadtong tungora gisultihan sa gwardya nga may lalaki nga biktima sa pagpamusil.

Sumala pa ni Arenas nga si Otida usa sa mga top ten wanted person sa ilang lungsod ug may warrant of arrest kini sa kasong paghupot og ilegal nga drugas. Suspek usab sa pagpusil ug  pagkaangol ni PO1 Demar Muaña si Otida.

Nagtoo ang kapolisan nga wa na makabayad ang biktima sa iyang amo nga si Otida hinungdan nga gilikidar na kini.   (BANAT NEWS)