Liboan misugat kang Roxas sa Lapu-Lapu

CEBU, Philippines - Liboan ka mga residente sa dakbayan sa Lapu-Lapu ang misugat kang Liberal Party presidential candidate Mar Roxas .

Si Roxas, kanhi Department of Interior and Local Government secretary naabot pasado alas 4 sa hapon sa Hoopsdome, sa Barangay Gun-ob  kauban ni Gov. Hilario Davide III ug uban pang mga opisyal nga kaalyado sa partido.

Apil sa misugat kang Roxas ang Deretso Team nga gipangulohan ni Mayor Paz Radaza ug anak niini nga si Kongresista Aileen Radaza, Vice Mayor Marcial Ycong ug ang mga konsehal ug opisyales sa dakbayan.

Si Roxas, mipasalamat sa suporta nga iyang nadawat  kaniadtong midagan siya sa pagka-senador. Usa sa gihisgutan ni Roxas ang kamahinungdanon sa 4P's o Pantawid Pamilyang Pilipino Program nga programa sa gobiyerno nga ang tumong matabangan ang kinabag-an sa mga kabus nga pamilya.

Sumala pa niya, kinahanglang mapadayon ang ‘Daang Matuwid’ ug ang Pantawid Program sa gobiyerno kay mao kini unya ang maghaw-as sa nasud gikan sa estado niini karon. Nagkanayon si Roxas nga buot niya nga patas ang pagtabang sa mga Pilipino dungan sa paghangyo nga suportahan silang duha ni LP Vice Presidential candidate Leni Robredo sa piniliay. (Christell Fatima Tudtud/EIM)(BANAT NEWS)