DTI nisusi na sa mga Christmas lights

CEBU, Philippines – Moabot na sa lima ka malls ang napaubos na sa inspeksiyon sa Department of Trade and Industry aron sa pagsuta sa compliance niini sa pagpamaligya og mga Christmas lights ilabi na nga nagkaduol na ang Pasko.

Gibutyag ni Zaide Bation, hepe sa Consumer Welfare and Business Regulation Division sa DTI-7, nga ang mga malls nahimutang sa habagatang bahin sa Sugbo lakip na sa siyudad sa Mandaue.

Nagsugod sila sa inspeksiyon niadto pa’ng buwan sa Oktubre.

Hinuon wala’y nakita nga kalapasan sa mga malls ug ang tanan nituman sa mga angay buhaton labot sa pagpamaligya og Christmas lights.

Nunot niini padayon ang pahimangno sa ahensiya sa mga mamalitay nga kadto’ng Christmas lights nga adunay ICC o PS mark ang paliton.

Gihimug-atan usab sa ahensiya nga kung mopalit og Christmas lights pilion kadto’ng hinimo gikan niadto’ng buwan sa Enero sa tuig 2013 hangtud karong tuiga.

Tumong niini ang pagseguro nga dili depektuso ang mapalit nga Christmas lights ug makalikay niadto’ng mga old stocks nga posible’ng mao’y hinungdan sa disgrasya sama sa sunog.

Karong semanaha ang DTI-7 mohimo og laing inspeksiyon sa mga malls sa dakbayan sa Sugbo lakip na usab sa mga gagmay’ng mga tindahan sa Carbon Market ug sa mga kilid-kilid.

Gihulagway ni Bation nga ang ila’ng ICC stickers lisud sundon niadto’ng mga tawo nga kusog kaayo mohimo og peke nga stickers tungod sa silver hologram ug security features.

Ang mall nga makalapas sa pagpamaligya og Christmas lights pamultahon og P25,000 ngadto na sa P150,000. – /GMR) (BANAT NEWS)