May BADAC Plan gamay pa

CEBU, Philippines - Gamay ra ang nanambong sa pagbukas sa Drug Awareness Month sa Plaza Sugbo kagahapon ubos sa tema, "Let's develop our lives, our communities, our identity without illegal drugs.”

Kini human tulo lang gikan sa 80 ka barangay sa dakbayan sa Sugbo ang may representante nga gilangkuban sa Kamagayan, Sambag 2 ug Quiot.

Si Dr. Alice Utlang, pangulo sa Cebu City Office on Substance Abuse Prevention (COSAP), nasagmuyo tungod kay gamay lang ang nitambong bisan og nagpadala sila og mga imbitasyon ug nanghinaut na lang atol sa ila’ng motorcade nga ipahigayon karong adlawa, daghan na ang manambong. Sumala pa ni Utlang nga niini’ng pagsaulog sa Drug Awareness Month kinahanglan gyud ang paghimo sa "make the right choice" sa pagpili sa higala, uyab ug trabaho.

Gibutyag ni Utlang nga padayon gihapon ang ila’ng trabaho sa COSAP diin 31 na ka trabahante sa barangay ang nagpositibo sa drug test diin 20 ang niangkon nga tiggamitan og drugas.

Samtang sa kagamhanan sa dakbayan, 46 ang nagpositibo diin pito ang niangkon nga tiggamitan og ginadili’ng drugas.

Samtang sumala pa ni Utlang nga 15 pa lang ka barangay ang nakaduso sa Barangay Anti-Drug Abuse Councils (BADAC) plan nga naglangkub sa Ermita, Kamagayan, Sambag 2, Binaliw, Day-as, San Antonio, Taptap, Suba ug Budlaan sa north district samtang sa south district ang San Nicolas, Duljo Fatima, Punta Princesa, Calamba ug Labangon.

Matud ni Utlang nga ubang barangay nitug-an nga duna sila’y problema tungod sa politika hinungdan nga wala pa nakaduso sa BADAC plan.

Si Atty. Clarence Paul Oaminal, consultant sa kampanya batok ilegal nga drugas, naglaraw sa pagsusi sa mga barangay nga wala pa makaduso sa BADAC plan tungod kay kalapasan kini sa balaud. (Rowena D. Capistrano/GMR)(BANAT NEWS)