Talamban dili pa mahatagan og tabang sa City Hall

CEBU, Philippines – Ang kagamhanan sa dakbayan sa Sugbo mibalibad nga dili pa kini makahatag og dugang financial assistance nga P5 milyones ngadto sa Barangay Talamban.

Si Atty. Dominic Diño, chief of staff sa opisina ni Mayor Michael Rama, mitataw nga pagsubay nila sa rekord sa City Accounting Office ilang nasuta nga ang Talamban wala pa makahatag og kompleto nga kwentada sa P13.1 milyones nga unang financial assistance ngadto sa barangay.

Ang City Hall nakadawat og suwat gikan ni Talamban Barangay Captain Dario Arcilla nga naghangyo nga ihatag na kanila ang P5 milyones nga financial assistance para sa barangay karong tuiga.

Si Diño mipasabot nga gilatid sa Presidential Decree 1445 kon Government Accounting and Auditing Manual (GAAM) nga dili mahimong hatagan og laing financial assistance ang usa ka barangay kun wala pa kini makahatag og kinatibuk-an nga kwentada sa gasto niini sa kuwarta nga unang gihatag alang sa mga proyekto.

Matud ni Diño nga ang Barangay Talamban nakahatag pa lang og kwentada sa P6.5 milyones kon katunga sa kinatibuk-an nga kantidad nga ilang nadawat.

Nabantayan nga kini usab maoy sitwasyon sa ubang mga barangay dinhi sa dakbayan mao nga ang City Hall dili pa makahatag kanila sa gahin nga gitagana diha sa Local Development Fund. Giawhag ni Diño ang kadagkoan sa Barangay Talamban nga paspasan nila pagsumiter ang mga gikinahanglang dukomento aron nga mahatag na kanila ang dugang financial assistance para karong tuiga.  (BANAT NEWS)