Cuevas 32 na ka kaso ang giatubang

CEBU, Philippines - Nipasaka na usab si kanhi mayor Tomas Osmeña og laing 20 ka kaso’ng administratiba batok ni Cebu City Treasurer Diwa Cuevas tungod sa kapakyas niini pagtuman sa lagda sa Government Accounting and Auditing Manual (GAAM).

Ang mga kaso didto gipasaka ni Osmeña sa rehiyonal nga buhatan sa Civil Service Commission (CSC) nga nadugang sa 12 ka una’ng mga susama’ng kaso nga gipasaka sa niagi’ng tuig.

Pagkakaron niabot na og 32 ka kaso ang giatubang ni Cuevas sa CSC ug may lain pa nga 26 ka kaso’ng administratiba nga didto gisang-at ni Osmeña sa Department of Finance sa Manila.

Giawhag ni Osmeña ang kadagkuan sa DoF nga suspensuhon si Cuevas sa katungdanan ug human sa imbestigasyon sa kaso, taktakon kini sa serbisyo tungod sa kapakyas niya pagtuman sa balaud.

Gibasehan ni Osmeña sa pagpasaka og kaso batok ni Cuevas mao ang daghang mga “adverse opinions” sa Commission on Audit kabahin sa financial transactions sa dakbayan sa Sugbo.

Pipila niini mao ang pagkwestiyon sa COA sa wala ma-liquidate nga minilyon nga cash advances nga gihatag sa mga opisyal ug kawani sa City Hall apan padayong gihatagan sa ila’ng sweldo ang mga hingtungdan.

Si Cuevas natingala kun ngano nga siya ra ang gipasakaan og kaso ni Osmeña. Matud ni Osmeña nga si Cuevas dili makabalibad sa mga mando kaniya sa mayor bisan og kini nahisupak na sa balaud.

Matud ni Mayor Michael Rama nga dili niya talikdan si Cuevas sa mga giatubang niini nga kaso nga naglambigit sa iya’ng trabaho. (Rene U. Borromeo)(BANAT NEWS)