10,600 benepisYaryo nahatagan na og ESA

CEBU, Philippines - Mikabat na sa P263 milyones ang Emergency Shelter Assistance (ESA) nga nahatag sa kagamhanan sa lungsod sa Daanbantayan alang sa mga biktima sa bagyong Yolanda.

Si Mayor Augusto Corro mibutyag nga ang maong kantidad alang sa unang batch kini alang sa 10,600 ka mga benepisyaryo.

Gipanghatagan og P10 mil alang sa mga pamilyang na-damaged ang balay ug P30 mil niadtong totally damaged gyud ang balay.

Matud ni Corro nga aduna pa silay P162 milyones nga pundo nga nahibilin alang sa ESA ug alang kini sa ikaduha nga batch nga 8,600 ka benepisyaryo.  Matud pa adunay mahibilin nga P10 milyones sa maong pundo.

Ang mga pangalan sa benepisyaryo  giplastada diha sa munisipyo aron mabasa sa tanan. Gituyo kini aron usab nga makatabang ang publiko pagsiguro nga kadtong nalista mga tinud-anay ug angayan gyud nga makadawat sa hinabang.

Ang lungsod adunay 21,676 ka  benepisyaryo sa ESA apan sa maong gidaghanon gibana-banang 2,476 ang dili mahatagan og ESA.

Gipasabot ni Corro nga ang maong dili mahatagan dili mga kwalipikado tungod kay anaa sila magpuyo sa danger zone, kadtong dunay income nga sobra sa P15 mil matag buwan, nakadawat og hinabang gikan sa non-governmental organization ug kadtong gipanghatagan na og mga balay.

Dugang ni Corro nga dili madali ang pagpanghatag sa ESA tungod kay higpit sila nga nagpahigayon og screening sa mga benepisyaryo kung kwalipikado ba kini.

Subay niini, human sa pagkuso-kuso sa bagyong Yolanda ang national nga kagamhanan migahin og pundo isip financial assistance ngadto sa kalungsuran nga naapektohan sa bagyo. (Brenda D. Batuto/EIM)(BANAT NEWS)