Nilabay sa puya nadakpan

CEBU, Philippines - Gidakop sa kapolisan ang usa ka babaye nga maoy gitumbok nga inahan sa puya nga bag-o pa nga gihimugso apan gilabay diha sa usa ka sapa sa Sitio Kalipay, barangay Opao, sa dakbayan sa Mandaue.

Ang gidakop ug gipasakaan og kasong infanticide usa ka 28-anyos nga ginang nga adunay tulo ka anak kansang bana bag-ohay lang naabot gikan nanarbaho sa gawas sa nasud.

Sumala pa ni Police Officer 3 Pearl Anne Flores, ang officer in-charge sa Womens and Children's Desk sa Presinto 5, base sa ilang  inisyal nga pakisusi  posibleng buhi pa ang bata dihang gilabay.

Kini human nga nagpositibo sa “floatation test” ang baga sa bata base sa resulta sa autopsy nga gihimo sa PNP Crime Laboratory. Miyerkules sa buntag dihang naukay ang mga tawo tungod sa napalgang usa ka batang babaye nga gituohang bag-o lang gihimugso nga naglutaw na sa sapa.

Nianang pagkasunod adlaw (Huwebes) sa gabii natultolan sa kapolisan ang ginang nga positibong gitumbok nga maoy inahan sa puya ug maoy nilabay niini diha sa sapa niadtong Nobiyembre 3.

Kagahapon, samtang gidala sa Mandaue City Prosecutor's Office ang 28 anyos nga inahan alang sa inquest proceedings kalit kining nangluspad ug nagdugo. Tungod niini, dali kining gidala sa tambalanan ug gipadayon pagkahapon ang pagsang-at sa kaso.

Sumala pa ni Flores adunay nibarog nga saksi nga nagpamatuod nga naghilak pa ang puya sa dihang gilabay kini sa sapa.

Nasayran nga minyo ang naasoy’ng babaye ug aduna silay tulo ka mga anak sa iyang bana kinsa bag-o pang naabot gikan nanarbaho sa gawas sa nasud niadtong kataposang bahin sa Oktubre.

Apan gidudahan nga nakamatikod ang bana nga mabdos kini maong nananghid nga mopauli una sa ilang probinsya.

Matud pang Flores, ang ginang manganakay na gyud unta niadtong Nobiyembre 3 ug nianang adlawa gipakatawo niini ang puya nga siya-siya ra sa tuyo nga dili mahibaw-an sa bana kinsa atoa pa sa probinsya.

Karong adlawa gikatakdang dad-on kini pagbalik sa tambalanan aron maatiman tungod sa peligro sa impeksyon dinala sa iyang pagpanganak. (Rowena Capistrano/EIM)(BANAT NEWS)