Bata gigamit sa Salisi gang

CEBU, Philippines - Nagpahimangno karon ang Theft and Robbery Section (TRS) sa Cebu City Police Office sa publiko sa laing modus sa mga Salisi gang nga mogamit og bata aron maoy mokuha sa bag o unsa mang butang gikan sa ilang biktimahon.

Kini human dunay usa ka estudiyante sa kolehiyo ang nakuhaan sa iyang bag nga adunay sulod nga mahalong selpon ug salaping cash nga 20 mil pesos nga pangbayad sa eskwelahan.

Ang panghitabo nakuhaan og footage  sa close circuit television (CCTV) sulod sa fast food chain diha sa ma’y dalan Colon ning dakbayan sa Sugbo, pasado alas 9 sa buntag niadtong adlaw nga Martes.

Ang biktima giila nga si Trisia Gubaton, 17, taga probinsya sa Surigao nga nagtungha dinhi sa dakbayan.

Matud pa sa higala sa biktima nga si Andy Ichin, 19, nga samtang sila nangaon ilang nabantayan ang usa ka babaye nga nagsige og tan-aw kanila diha sa ilang kilid.

Apan wala nila mabantayi ang usa ka lalaki nga milingkod sa ilang duol nga nagdala og batang babaye nga gibanabanang 5-anyos.

Nakita sa CCTV footage ang lalaki miduot sa bata paingon sa lingkoranan diin gibutang ang bag sa biktima ug ang bata maoy nikuha niini  ug dayon gikugos kini sa lalaki pagawas ug gisipitan ang bag. Ayha lang nabantayan sa duha nga nawagtang na ang bag human sa ilang pagpangaon.

Ang duha midangop sa Carbon Police Station apan giingong giingnan lang sila nga pahibaw-on lang kun ilaha nang madakpan hinungdan nga ilang gi-post sa social media ang footage.

Apan ang pangulo sa Carbon Police Station Chief Inspector Noel Lomente nibutyag sa Banat News, nga gitubag sa ilang beat patrol ang maong reklamo apan wala na sa maong lugar ang mga suspetsado.

Sumala pa ni Lomente makig-alayon sila sa kadagkuan sa maong fast food chain nga kinahanglan pa mangayo og pagtugot gikan sa ulohan nga buhatan niini aron makakuha og kopya.

Ang hepe sa TRS sa CCPO Sr. Insp. Ronito Supatan mipahimangno sa publiko nga di mokompiyansa pagbilin-bilin sa ilang mga gamit sa pangpublikong lugar. (BANAT NEWS)