P1.3M alahas nakawat sa pawnshop
CEBU, Philippines – Kapin sa usa ka milyon ka pesos nga kantidad sa mga alahas ang nadala sa dili mominos duha ka kawatan nga milungkab sa usa ka pawnshop sa barangay Poblacion lungsod sa San Remigio.
Ang teller sa Dover Pawnshop nga si Rosalyn Quinatadcan maoy nakadiskubre sa maong hitabo sa dihang kini mosulod na unta sa iyang trabaho pasado alas 7 niadtong nakalabay nga buntag.
Matud pa ni Police Officer 3 Dante Teaño ang desk officer sa San Remigio Police nga nahinabi sa Banat News nga miagi ang mga kawatan sa butanganan og aircon sa pikas establisamento nga bakante.
Migamit og bolt cutter ug crow bar ang mga kawatan hangtod nga sila nakasud sa pawnshop.
Giguba ‘sab sa mga kawatan ang vault sulod sa pawnshop diin ilang nalimas ang daghang mga alahas nga mikantidad og P1, 392, 700 ug cash nga P296, 523. Narekober sa kapulisan sa crime scene ang bolt cutter ug crow bar nga gigamit sa mga kawatan.
Walay close circuit television (CCTV) ang maong pawnshop ug wala ‘sab kini guwardiya.
Si Teaño nagduda nga giplanohan og maayo sa maong mga kawatan ug gi-tayming niini nga duna’y kasaulogan sa kalag-kalag ug halos nagbakasyon ang mga tawo. – /EIM) (BANAT NEWS)
- Latest
