Dul-an P3.8 M shabu nasakmit
CEBU, Philippines – Mokabat sa P3.8 milyones nga kantidad sa shabu ug mga armas ang nasakmit sa hiniusang operasyon sa mga sakop sa City Intelligence Branch sa Cebu City Police Office, San Fernando Police ug Philippine Drug Enforcement Agency (PDEA-7) diha sa barangay Pitalo lungsod sa San Fernando kagahapon sa hapon.
Target sa kapulisan sa ilang operasyon sila si Ruel Garces ug Leonardo Gesnan nga giingong supplier sa drugas sa 20 anyos nga lalaki nga unang nadakpan sa mga sakop sa CIB sa barangay Labangon niadtong adlaw nga Sabado nga nakuhaan og usa ka kilong shabu. Apan atol sa maong operasyon tayming nga wala sa ilang gipuy-an ang duha ka suspetsado sa dihang naabot ang mga otoridad.
Matud pa ni Supt. Romeo Santander, hepe sa CIB nga nahinabi sa Banat News sa interogasyon nila kang Genesis Ermitanio nga nadakpan niadtong Sabado mitug-an kabahin sa duha.Mao’y hinungdan nga mihimo dayon sila og operasyon kauban ang PDEA-7 ug didto ilang nasayran nga adunay pending warrant of arrest sa kaso sa drugas si Garces ug hapit na sab mogawas ang warrant ni Gesnan sa susamang kaso. Nakuha sa mga awtoridad ang 25 gramos nga shabu nga mikantidad og P3.8 milyon usa ka shotgun ug duha ka .22 caliber rifles, tulo ka motorsiklo nga gituohang kinawat. – /EIM) (BANAT NEWS)
- Latest
