Hapsay ug malinawon

CEBU, Philippines – Hapsay ug nagmalinawon ang pagsaulog sa dakbayan sa Sugbo sa kalag-kalag kagahapon.

Si Senior Superintendent Marciano Batiancela, officer-in-charge sa Cebu City Police Office nga nahinabi sa mga tigbalita nagkanayon nga wala’y dagkong panghitabo sila nga natala nga nakaapektar sa paghinumdom sa kalag-kalag.

Kagahapon sa sayo sa buntag hangtod sa gabii , gilibot ni Batiancela ang mga pribado ug publikong sam-ang dinhi sa dakbayan.

Nagpasalamat sab ang opisyal nga wala kaayo’y nakuha nga mga hinagiban gikan sa mga tawo nga mosulod sa mga sam-ang. Magpadayon ang higpit nga pagbantay sa mga sam-ang hangtud ugma Nobiyembre 3. Samtang sa pakighinabi sa Banat News sa hepe sa Police Community Ralations (PCR) Chief Inspector David Señor, kini miingon nga kagahapon sa alas 5 sa hapon miabot na sa 62, 974 ka mga tawo ang midagsa sa mga nag-unang sam-ang dinhi sa siyudad. Kini naglakip sa Calamba, Carreta, Sim Park, Pardo ug Queen City Memorial Gardens, apan gipaabot nga mas modaghan karong adlawa ang moduaw sa mga sam-ang ilabi na sa gabii.

Sa Queen City Memorial Gardens, duha ka mga replica sa armas ang nasakmit sa mga sakop sa Mabolo Police Station.

Ang Metropolitan Cebu Water District nagbutang usab og libreng mainom nga tubig duol sa mga dagkong sam-ang. – /EIM) (BANAT NEWS)