Unos dala sa hanging amihan

CEBU, Philippines – Nabulabog ang mga tawo nga naglinya sa mga terminal, pantalan ug malls sa dakbayan sa Sugbo atol sa pagbunok sa kusog nga uwan nga adunay dala nga kusog nga hangin.

Ang presiding officer sa Cebu City Disaster Risk Reduction and Management Council, Konsehal Dave Tumulak, nibutyag sa Banat News, nga ang nasinati usa lang ka localized thunderstorm bunga sa hanging amihan.

Sa pagsubay sa Banat News sa command center pipila ka oras human sa unos ug uwan, wala’y natala nga mga insidente.

Si Director Oscar Tabada sa Philippine Atmospheric, Geophysical and Astronomical Services Administration (PAGASA) nibutyag nga ang unos gumikan sa Northeast Monsoon o Hangin nga Amihan nga angay matngonan sa mga nagbiyahe nga gagmay nga sakayan sa kadagatan.

Sumala pa ni Tabada nga masinati gihapon karong adlaw ang pag-uwan-uwan gumikan sa Amihan ug mas kusog nga uwan ang mahitabo karong Lunes ug Martes apan wala’y angay kabalak-an kay wala’y bagyo.

Pahimangno ni Tabada sa mga mobisita sa mga sam-ang nga magdala og mga payong lakip ang mga kapote aron dili mangabasa panahon sa uwan ug malikayan ang posible’ng pagtumaw sa mga sakit.  (BANAT NEWS)