Canadian, bata angol; lola patay sa bangga

CEBU, Philippines – Naangol ang usa ka Canadian human mabag-iri sa ten-wheeler cargo truck ang gisakyan nga motorsiklo sa barangay Cabitoonan, dakbayan saToledo.

Ang biktima naila nga si Norman Toews, 71, kasamtangang nagpuyo sa barangay  Tajao, Pinamungajan.

Ang biktima paingon unta’ng mopauli dihang kalit ni-overtake ang cargo truck ug naigo ang luyo nga bahin sa iya’ng motor.

Si Daphne Caragon, 31, minyo nga taga Cabitoonan ang drayber sa trak.

Nakaangkon og samad og bun-og sa nagkadaiya’ng bahin sa lawas ang langyaw ug gidala sa Toledo City Hospital apan gibalhin sa usa ka tambalanan sa dakbayan sa Sugbo.

Samtang naangol usab  ang 7-anyos nga bata’ng lalaki human nadasmagi og motorsiklo sa sitio Dakit, Cabitoonan, Toledo.

Ang biktima mao si Esac Maasin ug ang drayber sa motorsiklo nailhan nga si Liverato Tercero, 21, molupyo sa barangay Sam-ang sa mao’ng dakbayan.

Gikan sa barangay Ibo si Tercero dihang kalit lang nilabang ang bata hinungdan nga nadasmagan ug maayo’ng pagkalukapa sa karsada ug dali’ng gidala sa tambalanan.

Samtang patay ang usa ka 70-anyos nga wala mailhi’ng lola human nabanggaan sa usa ka Nissan Navarra Pick-up kagahapon sa sayo sa buntag sa S. Osmeña Avenue sa dakbayan sa Sugbo.

Ang sakyanan nga may plate number nga FST 254 nga nakabangga giingong nisutoy sa pagpadagan nga may sakay nga daghang pasahero. Si PO3 Noel Melecio Belicario, imbestigador, niingon nga kalit lang nilabang ang tiguwang sa karsada ug tungod sa ka kusog sa impact ang tiguwang nabunal sa aseras.

Gitabang pa unta ang tiguwang apan sa paghidangat sa tambalanan gideklarar kini nga patay na.  (BANAT NEWS)