Polis ‘protektor’ nadakpan sa Siquijor

CEBU, Philippines – Usa ka polis ang gidakop sa mga polis sa Siquijor human nga kini gidudahang maoy protektor sa illegal numbers game nga gibase sa Swertres sa Philippine Charity Sweepstakes Office (PCSO) kagahapon sa buntag didto sa Lazi, Siquijor.

Nagtingkagol na sa prisohan si Police Officer 3 Luther Lapinig sakop sa Regional Intelligence Unit-7 human kini nadakpan samtang nag-supervise sa 13 ka lalaki nga nag-tally sa numero sa maong ilegal nga  sugal.

Sumala pa ni Superintendent Enrique Belciña, deputy provincial director for operations sa Siquijor Police Provincial Office nga naatlan sa mga polis ang maong mga dinakpan.

Sumala pa niya nga nag-checkpoint ang mga sakop sa Provincial Public Safety Platoon ug ang mga sakop sa Lazi Police Station sa barangay Nagerong sa maong lungsod niadtong tungora tungod sa nahitabong pagpamusil diin ang biktima usa ka Gilbert Bangos ug ang suspek mao ang usa ka Kim Lapinig.

Apan sa pagsubay sa balay sa suspetsado naagian sa mga polis ang usa ka pundok sa mga tawo nga nag-tally sa ilegal nga sugal. Dali nila kining gialirongan ug gikalitan paghamag hinungdan nga wala sila makaikyas.

Si PO3 Lapinig  nakuhaan og usa ka KG-9 submachine pistol ug ang iyang isyu nga pistola. Matud pa ni Belciña pasakaan nila og kaso si Lapinig ug ang kauban niining mga dinakpan.

 (BANAT NEWS)