Mga tanom nga marijuana gipangibot sa polis
CEBU, Philippines - Nasakpan ug gipangibot sa kapolisan ang kapin sa 600 ka linghod pa nga punoan sa marijuana nga gitanom sa hilit nga dapit sa Sitio Buli, Barangay Liburon, Carmen.
Si SPO2 Simplicio Gibo sa Carmen Police Station miingon nga ang ilang buhatan nakadawat og taho kabahin sa gipananom nga marijuana sa usa ka bakante nga luna.
Diha-diha dayon, si Carmen Police Chief John Philip Libres mimando dayon sa iyang mga sakop sa pagsusi niini ug napamatud-an nila nga tinuod ang report.
Layo sa balay ang dapit nga gitamnan sa mga marijuana ug walay nakatug-an kun kinsa ang nagtanom.
Gimando ni Inspector Libres nga pangibton ang maong mga marijuana ug gidala kini ngadto sa ilang buhatan.
Si SPO2 Gibo miingon nga padayon sila nga nagpakisusi aron mahibaw-an kinsa g’yud ang nagtikad sa maong dapit nga gitamnan og marijuana. (BANAT NEWS)
- Latest
