Polis namasangil, nanion

CEBU, Philippines – Laing polis na sab ang gireklamo nga nanagmal sa usa ka lalaki ug giingong nanion sa iya’ng armas human kini nagduda nga mao’y nikuha sa iya’ng helmet niadto’ng nakalabay nga semana sa Sangi Kamanggahan, Pajo, dakbayan sa Lapu-Lapu.

Ang gireklamo nga polis mao si Police Officer 1 Genor Regencia, jailer sa Lapu-Lapu City Police Office detention cell.

Ang mao’ng polis ang gipaubos na karon sa imbestigasyon human ang biktima nga si Ramir Moreno, 37, ang nagpakitabang sa kapolisan.

Si Moreno giingong niadto sa balay sa iya’ng ginikanan sa barangay Pajo nga silingan ra sab sa balay sa polis.

Pasado alas 8 sa Huwebes sa buntag, gisugo sa iya’ng inahan si Moreno sa pagpalit og kape sa tindahan duol sa ila’ng balay apan giingong gisundan ni Regencia ug gipatiran ang paa.

“Wa gyud ko nakahibawo unsa ako’ng gibuhat. Gideretso ra gyud ko og sikad lagi unya iya ko’ng gitionan,” matud ni Moreno.

Ang inahan ni Moreno nga si Visitacion ang nakadungog pa sa polis nga niingon nga, “Pagbantay kay planteran tika og shabu. Ipa-raid ko na inyo’ng balay.”

Nasayran ni Visitacion sa asawa sa polis nga nagduda si Regencia nga si Moreno ang nagkawat sa iya’ng helmet.

Nag-abot na sa buhatan sa kapolisan ang duha ug giingong nangayo na og pasaylo ang polis apan porsigido gyud nga mopasaka og kaso ang biktima ug ang inahan.

“Di gyud ko makapasaylo kay ikiha gyud nako,” dugang sa inahan.

Samtang ang hepe sa Lapu-Lapu City Police Office, Senior Supt. Armado Radoc, niingon nga andam sila nga motabang sa mga reklamante kung kini moreklamo sa iya’ng buhatan. – /GMR) (BANAT NEWS)