E-trike wa’y seguro makapamasahero
CEBU, Philippines – Gitug-an ni Bise Mayor Romeo Villarante sa siyudad sa Talisay nga bisan pa man og marehistro sa Land Transportation Office ang mga electronic tricycles, wala’y kasegurohan nga magamit kini sa pamasahero.
Kini gumikan kay kinahanglan pa nga usbon ang desinyo aron dili mabutang sa peligro ang sumasakay.
Gawas pa niana, si Villarante nagkanayon nga daghan na kaayo ang nagdagan nga traysikol sa siyudad nga moabot na sa 1,800 ang adunay prangkisa.
"Nindot man ni nga sakyanan pero tan-aw nako wala ni siya gi-design aron ipamasahero. Mas maayo gani ni kay eco-friendly man. Kinahanglan lang gyud nga adunay usbon sa design aron luwas ang mga sumasakay," matud ni Villarante.
Si Konsehal Antonio “Jojo” Bacaltos kinsa tsirman sa komitiba sa kalikupan nibutyag nga maayo nga ihulip sa nagdagan nga mga traysikol ang e-tricycle tungod sa pagka-environment-friendly niini.
Ang mga electronic tricycle ang gipanakop sa taga LTO gumikan kay wala’y rehistro ug prangkisa.
Kini human usab ang grupo sa mga traysikol drayber ang nangreklamo.
Gumikan sa mao’ng kalambuan, naglaraw ang grupo sa nanag-iya og e-tricycle nga ila na lang i-uli sa kompaniya nga ila’ng gikuhaan.
Si Bacaltos niingon nga maayo’ng tun-an ang posibilidad nga kun marehistro na ang e-tricycle ang matang sa makina niini ang ihulip na lang sa mga traysikol nga nagdagan aron makatabang sa kalikupan. – /GMR) (BANAT NEWS)
- Latest
