Duha ka bata gipatay sa tiyo

CEBU, Philippines – Duha ka dalagita giunay pagpatay sa ilang uyoan didto sa dakbayan sa Carcar pinaagi sa paggulgol sa ilang mga liog gamit ang hait kaayong sundang nga alang unta sa pag-ihaw og baboy sa adlaw sa mga “minatay.”

Didto kini mahitabo sulod mismo sa balay sa mga biktima sa Sitio Lower Kalangyawon, Barangay Napo, Carcar kaniadtong Lunes sa gabii. Ang gipatay mao sila si Charmaine Mangyao, 11, ug si Rosalyn Mangyao, 16.

Ang nagpatay kanila mao si Domingo Mangyao, 29, nga manghod sa amahan sa mga biktima, nga nagpakamatay usab human sa paghimo niya sa krimen mga alas nuybe sa gabii.

Si Domingo bag-ohay lang nga nakagawas gikan sa bilanggoan kay napriso usab kini sa pagpang-hostage og bata ug gipasakaan usab og kaso nga illegal possession of firearms.

Ang amahan sa mga biktima nga si Ranulfo Mangyao nagtuo nga ang iyang igsuon migamit og drugas mao nga nayabag ang pangisip ug gipatay ang iyang mga pag-umangkon.

Si Charmaine nagtungha sa Grade 5 sa Kalangyawon Elementary School samtang si Rosalyn, Grade 9 sa Kalangyawon National High School. Matud ni Ranulfo nga hilomon ang iyang manghod ug wala siya magtuo nga makahimo kini sa krimen.

Ang sundang bag-o pa nga pinalit ni Ranulfo aron gamiton unta sa pag-ihaw og mga baboy karong “Kalag-Kalag.” Ang mga ginikanan sa duha ka dalagita mibiya sa ilang panimalay kaniadtong Lunes sa gabii kay may gitambongan nga pangadye.

Pag-uli nila gikan sa gitambongang pangadye gisugat na sila sa ilang mga apo nga maoy mitug-an nga ang ilang duha ka ate gipatay.

Si Charmaine maoy nagrabehan kay panit na lang ang naghawid nga dili mabuwag ang ulo gikan sa iyang liog, samtang daghang samad usab ang naangkon ni Rosalyn.

Nagmahay kaayo si Ranulfo ngadto sa iyang manghod nga miunay pagpatay sa iyang mga pag-umangkon. Matud ni Ranulfo nga ang 16-anyos niya nga anak nagplano unta nga mahimong maestra o kaha polis.

Si SPO4 Jorame Tanudtanud sa Carcar City Police Station miingon nga anaa karon kanila ang sundang nga gigamit sa pagpatay sa mga bata.

Samtang kadtong duha ka gagmay’ng bata nga nakakita pagpatay sa mga biktima gikustudiya karon sa City Social Welfare Development Office aron ipaubos og stress de briefing.

Matud ni Carcar City Mayor Nice Apura nga tabangan sa dakbayan ang pamilya sa mga biktima.

Si Dr. Renato Obra, hepe sa Center for Behavioral Science sa Vicente Sotto Memorial Medical Center, nagtuo g’yud nga nainpluwensya sa ilegal nga drugas ang mipatay sa mga bata.

Giawhag ni Dr. Obra ang katawhan nga magpakabana g’yud sa problema sa ilegal nga drugas. – /RUB) (BANAT NEWS)