Mga “carnappers” nadakpan sa Tabuelan

CEBU, Philippines – Nadakpan sa kapolisan ang upat ka tawo, lakip na sa usa ka menor de-edad, nga giingong maoy mangawat og mga motorsiklo diha nga gironda ang ilang gipuy-an didto sa Barangay Poblacion, Tabuelan kaniadtong Biyernes sa gabii.

Ang gipangdakop mao sila si Ronel Moniva, 28; Nelson Moniva Jr., 24; Jerry Dela Cerna, 18; ug ang usa ka 16-anyos nga lalaki.

Ang mga polis nga gipangulohan ni Tabuelan Police chief Welther Grapa mironda sa gipuy-an sa mga suspek base sa search warrant nga giisyu sa hukmanan.

Una nga gironda sa kapolisan mao ang balay ni Nelson Moniva nga miresulta sa iyang pagkasikop uban ni Dela Cerna ug sa menor de-edad.

Narekober sa kapolisan ang walo ka motor ug usa niini kalabera na ug gipanguhaan og mga piyesa.

Samtang diha nga giimplementar ‘sab nila ang search warrant ngadto sa balay ni Ronel Moniva, nakuha usab sa mga polis ang usa ka motor nga gituohan nga kinawat.

Matud ni Cebu Provincial director Noel Gillamac nga ang upat naglihok isip usa ka sindikato. Si Gillamac miingon nga maayo’ng pagkaorganisar ang ilang operasyon ug may mopalit na sa mga kinawat nila nga motor, sagad niini tigbaligya og mga piyesa.

Giawhag ni Gillamac ang katawhan nga dili mopalit og motor nga kwestyonable ang mga papeles labi na kun wala’y rehistro.

Kagahapon sa buntag, duha ka tag-iya og motor ang miadto sa CPPO ug niangkon nga ila ang usa ka motor nga narekober sa kapolisan.

Si Rey Mangas, 26, maestro sa Danao, miingon nga ang iyang XRM nga motor gi-park lang niya atubangan sa iyang balay sa Guinsay, Danao City diha nga gikawat.

Daku ang pagpasalamat ni Mangas nga nasakmit pagbalik sa kapolisan ang iyang motor nga iyang hinagoan  ug naimpas na kini pagbayad human sa duha ka tuig nga pagdata-data.

Ang kapolisan miawhag niadtong mga nawad-an og motor sa pagbisita sa CPPO aron mahibaw-an kun apil ba ang ilang mga motorsiklo nga narekober sa Tabuelan.

Samtang nakadakop og suspetsadong carnappers ang kapolisan, ang igsuon ni Provincial Board Member Grecilda Sanchez gikawatan sa iyang kotse sulod sa Capitol Compound kagahapon.

Si Leodereco “Greco” Sanchez miingon nga wala gyud siya makabantay nga gikawat ang iyang giparada nga Ford Ranger samtang miadto siya sa opisina sa iyang igsuon.

Ang kotse ni Greco didto niya giparada sa parking area atubangan sa Capitol Legislative Building kagahapon sa udto.

Matud ni Greco nga ang bugtong adunay duplicate nga yawe sa sakyanan mao ra ang iyang asawa nga si Cebu City Assistant Prosecutor Mary Ann Castro.

Nasayran nga si Greco ug si Castro dili na maayo ang ilang relasyon kay gusto na niya nga buwagan ang iyang asawa tungod sa pagtuo nga wala na masubay sa balaod ang ilang kasal nga gipaagi sa Muslim Tradition kaniadtong Agosto.

Pagka karon, padayon pa ang imbestigasyon sa kapolisan human nga si Greco mireport nga gikawat ang iyang bag-o nga sakyanan. – /RUB) (BANAT NEWS)