Mga imbestigador nga Insik nangabot sa Sugbo

CEBU, Philippines – Niabot sa Sugbo kagahapon sa buntag ang napulo ka sakop sa Ministry of Public Safety sa China aron makig-alayon sa paghimo’g imbestigasyon sa pagkapusil sa duha ka Chinese nationals sulod sa usa ka kan-anan sa miaging semana.

Ang mga Chinese investigators nakigkita ni Police Regional Office (PRO)-7 Director Prudencio Tom Bañas aron nga makig-alayon sa pagahimoon nila nga imbestigasyon.

Tigumon nila ang gikinahanglan nga dukomento aron kapasakaan nila og kaso ang Chinese Consul nga namusil sa kauban nila nga mga Chinese national.

Matud ni Bañas nga ang Chinese delegation wala moari sa Sugbo aron sa pagpahigayon og buwag nga imbestigasyon, kun dili, makig-alayon sila sa mga imbestigador sa Cebu City Police Office.

Si Bañas miingon nga mangayo ang Chinese investigators sa resulta sa imbestigasyon sa CCPO kay sila dili makalihok dinhi kun walay pagtugot.

Gitataw ni Bañas nga ang gihimo sa kagamhanan sa China nahasubay sa Consular Agreement nga napirmahan sa Pilipinas ug sa China.

Kun mahuman na ang paghipos sa mga gikinahanglan nga dukomento, adto sa China ipasaka ang kaso batok sa mga suspek nga si Li Quing Liang ug asawa niini nga empleyado ‘sab sa Consular Office sa China sa Sugbo.

Samtang giimbestigar karon ang usa ka polis tungod kay adunay nakita nga kalapasan sa iyang gibuhat atol sa pag-imbestigar sa maong insidente.

Si CCPO director Marciano Batiancela Jr. maoy gimandoan ni Bañas nga mohimo sa imbestigasyon. Wala tumana sa polis ang “specific instruction” sa iyang labaw nga i-secure ang mga suspek sa pagpamusil. – RUB) (BANAT NEWS)