Grade-4 nalumos patay
CEBU, Philippines - Patay na’ng napalgan ang 9-anyos nga bata’ng babaye nga giingong nalumos sa sapa sa Binaliw, dakbayan sa Sugbo niadto’ng Huwebes sa hapon.
Ang biktima giila nga si Jiecel Codeniera, tinun-an sa Grade-4 sa Binaliw Elementary School.
Matud ni Senior Police Officer 2 Rommel Bancog, imbestigador sa Homicide Section sa Cebu City Police Office, nga kuyog ang biktima sa iya’ng mga classmates sa pagpangaligo sa sapa human sa pagpaniudto.
May gilay-on nga 500 metros gikan sa eskwelahan ang sapa nga agianan usab sa biktima matag adlaw.
Diha’ng namalik na sa tunghaan ang mga classmates, giingong nagdumili si Codeniera sa pag-uban ug nagpabilin sa sapa.
Usa ka Jose “Otik” Baguio, 60, mag-uuma, kinsa nagtugway sa baka ang nakakita sa biktima nga naglutaw na sa sapa hinungdan nga nangayo kini og tabang sa silingan nga si Nolasco Diano ug nipahibawo sa mga tanod.
Gidala pa sa Cebu City Medical Center ang biktima diin siya gideklarar nga patay na.
Gisusi karon sa kapolisan ang insidente human adunay samad sa ulo ang biktima.
“Di pa gyud ko kaingon kung unsa’y rason ato. Nagpadayon pa gyud mi sa amo’ng investigation,” matud ni Bancog. (Gikan sa The Freeman/GMR)
E-trike sa Talisay gipangdakop
Gisugdan sa Land Transportation Office ang pagpanakop sa mga electronic tricycle nga wala’y rehistro sa Poblacion, dakbayan sa Talisay kagahapon sa buntag.
Duha ang nadakpan nga sila si Julito Bejig, taga Mohon ug Ricardo Lipasan, taga Dumlog, kinsa giingong adunay tag-duha ka kalapasan ang nangadakpan.
Kini mao ang pagmaneho sa e-tricycle nga wala’y lisensya ug ang wala pagrehistro sa sakyanan.
Multa nga P10 mil ang ipahamtang sa paglapas sa registration.
Ang mga tricycle drivers nangreklamo sa pagdagan sa mga e-tricycles nga nakaapektar sa ila’ng panginabuhian.
Matud sa OIC Regional Director sa LTO-7, Arnel Tancinco, nga dunay mga e-tricycle nga dili na kinahanglan iparehistro sa LTO apan kadto’ng butangan og sidecar kinahanglan gyud og rehistro.
Wala pa’y regulation ang LTO kalabot sa paghimo og de-pasaheroan sa e-tricycle kay wala pa’y gipagawas ang Department of Transportation and Communication nga lagda bahin niini. (Gabriel C. Bonjoc ug Decemay P. Padilla/GMR)(BANAT NEWS)
- Latest
