Gisugo panguha og bato

CEBU, Philippines - Giklaro sa amahan sa usa sa tulo ka batang na-missing sa Olango Island niadtong Domingo, nga wala niya sugoa ang 9-anyos nga si Shaun Michael aron managat niadtong adlawa nga nanakay kini og bangka kauban ang laing duha ka bata palawod sa dagat.

“Wa nako sugoa nga moadto sa dagat kay nanguha ra man to sila og bato sa kalsada. Naay duha ka lalaki nga mitintal ni Shaun nga mamasol sila sa dagat. Naa pud laing usa ka bata nga mitambag niya nga dili mamasol kay hangin ron. Miingon balik ang katong kaestorya nila nga bata nga swerte-swerte lang kung mamatay maayo,” matud ni Gregorio Daño nga amahan ni Shaum Michael nga nakahinabi sa Banat News.

Kuyog ni Shaun Michael nga na-missing ang iyahang ig-agaw nga si Jose Maria Edgardo Dano, 16 anyos ug si Aaron Hida, 15 anyos. Aduna silay laing kauban nga nailhan lang sa pangalan nga “Dibdib”, 10 anyos ang pangidaron.

Tungod kay adunay parti sa ilahang dapit nga hunasan, nagkanayon si Gregorio nga milakaw sila gikan sa pantalan sa isla ug nakakita og bangka nga gipanag-iya ni Pario Agus ug gisakyan apan wala midayon og sakay si Dibdib  kay gamay ang bangka.

 “Mura man og nagdali sila, mao nawagtang sila og kalit. Mao na diay to nisakay na og baroto. Mura ra siya’g (Shaun Michael)  wala kay abi niya naa ray nagbantay sa may pantalan,” paambit ni Gregorio.

Walay trabaho si Gregorio tungod kay nasakit kini og TB sa bukog sulod sa unom na ka buwan samtang ang asawa niini masahista sa mga turistang Koreano. Nanawagan si Gregorio sa gobiyerno nga unta daghan ang magtinabangay pagpangita sa mga bata ug malaumon nga maluoy ang sakop sa Philippine Air Force pagpagamit sa ilang helicopters aron makit-an sila.

Mibutyag usab si Gregorio nga sa tulo nga na-missing ang iyaha rang anak maoy makamaong molangoy.

Samtang si Marilou Hida nga inahan ni Aaron nagkanayon nga sukad sa pagkawagtang sa iyang anak wala na siyay tarong og katulog.

Nakahinumdom pa siya nga niadtong Sabado nagpatudlo si Aaron kaniya kun unsaon pagluto og siyakoy. Matud pa niya, mao kini ang tiglung-ag og kan-on para sa ilang paniudto kada adlaw nga walay klase ug pirme kining motabang sa ginbuhaton sa ilang balay.

“Naluya ko og pangita, giapas nako iyahang barkada wala sila nakakita. Didto sa baybayon, sa may lim-aw wala gihapon. Dili man ‘to siya hilig og dagat kay di man to kamao molangoy kahibaw ra to siya duwa og internet games sa computer,” dugang ni Marilou.

Si Andy Berame, deputy officer sa City Disaster Risk Reduction Management Council miangkon nga hangtud karon wala pa gihapon nila makita ang mga bata  bisan sa gihimong aerial search operations sa PAF ug pagpangita pinaagi sa pagsakay og motorized pump boats sa Philippine Navy ug sa Olango Police Station.

"Buhi o patay, mayta mabalik sa amo ang among anak," dugang pa ni Marilou.  (BANAT NEWS)