2 chinese di mapriso dinhi

CEBU, Philippines - Dili pwedeng husayon ang kaso ug prisuhon dinhi ang magtiayong Chinese nga nipusil patay sa duha ka mga Chinese consular staff ug miangol sa ilang Consul General sud sa Lighthouse Restaurant sa dalan Mango Avenue, Cebu City niadtong Miyerkules sa udto.

Kini maoy giklaro sa Department of Foreign Affairs kagahapon sumala sa report sa The Philippine Star igsuon pamantalaan sa Banat News.

 “They enjoy diplomatic immunity. Custody will be given to the Chinese side and they will undergo the legal process in China,” sumala pa ni Foreign Affairs spokesman Charles Jose sa usa ka press briefing.

Matud pang Jose, adunay mangabot nga security team gikan sa Beijing sa Manila karong mosunod nga mga adlaw aron ikostudiya ang magtiayong sila si Li Qing Ling, 60, ug asawa nga si Consul Gou Jing.

Ang duha maoy suspek sa pagkaangol kang Chinese Consul General Song Rong Hua ug mipatay sa iyang staff nga sila si deputy consul Sun Shan ug finance officer Hui Li atol sa usa ka birthday party sa usa nila ka kauban sud sa maong kan-anan.

“The Chinese embassy in Manila and consulate in Cebu has been extending their full cooperation with Philippine authorities regarding the investigation. The two sides will properly handle the matter in accordance with the Vienna Conventions on Diplomatic and Consular Relations and the 2009 Consular Agreement between the Republic of the Philippines and the People’s Republic of China,” pagklaro pa ni Jose.

Sila si Li ug Guo, nadestino sa visa section sa konsulada daan nang mitug-an sa mga polis nga miaresto kanila nga silang duha adunay diplomatic immunity.

"The couple ... are still in our custody but in view of an agreement between the Philippines and China, we would respect and honor their immunity," sumala pa sa usa ka opisyal sa kapolisan dinhi sa Sugbo nga wala magpahingalan.

Si Senior Superintendent Rey Lawas sa report sa Philippine Star miingon nga dunay pagduda ang mga imbestigador nga personal nga panagbingkil bahin sa kuwarta tali nila ni Li ug sa mga namatay.

"They have been at odds for a long time over personal finances," pasabot pa ni Lawas ug midugang nga personal gyud ang motibo sa maong pagpamusil.

Ang mga kawani sa maong kan-anan miingon nga nakadungog sila og binanghagay gikan sa function room nga gikahimutangan sa mga Chinese guests ug sunod nilang nadunggan mao na ang butobuto sa armas.

Gisubay karon sa kapolisan kun asa gikan ang armas nga gigamit sa krimen, apan nasuta nga ang serial number niini hinimo-himo lang apan nitakdo sa usa ka armas nga adunay susamang serial number nga narehistro sa Manila.

"In Cebu, it's easy to procure a gun because of a large cottage industry for homemade guns," matud pa sa laing usa ka polis nga wala usab magpahingan.

Ang Chinese Global Times newspaper nga iya sa gobiyerno sa China mipagawas og editorial niadtong Huwebes nga dili lalim ug kapoy kaayo ang trabaho sa mga diplomats.

Si Chief Superintendent Prudencio Tom Bañas, direktor sa Police Regional Office 7 nihimo og close-door conference kauban sa DFA-7 kagahapon alang sa paghisgot sa maong insidente. Matud pa ni Bañas, ang China nagpakisayod kung unsay tinuoray nga nahitabo ngadto sa mga biktima.

Giklaro ni Bañas nga wala dakpa kun dili giimbitar lang ang duha ka suspek gikan sa consular office aron pangutan-on kabahin sa maong insidente.

Base sa Geneva Convention, ang embahada o consular office sa usa ka nasud makonsiderar nga ‘extension’ sa teritoryo sa usa ka nasud ug dili mahimong sudlon sa host country bisan anaa kini nahimutang sa ilang nasud.

Si Bise Gobernador Agnes Magpale mipadayag sa iyang kasubo sa insidente tungod kay ang mga nalambigit nga Chinese nakauban nila sa pipila ka mga opisyal nga kalihokan sa lalawigan. (Gikan sa The Philippine Star ug nila ni Rowena Capistrano, Brenda Batuto /EIM)