Normal lang ang troop rotation—Vivar

CEBU, Philippines - Gihimakak ni Lt.  General Nicanor Vivar, pangulo sa Central Command nga dili ang militanteng pundok ang hinungdan nganong gihulipan ang 2nd Special Forces nga nakabase sa lalawigan sa Bohol.

Matud pa niya kabahin sa ilang “national maneuver battalion” ang maong mga sundalo  ug mahimo silang idestino sa bisan asa nga lugar.

Kagahapon sa buntag, gihimo ang send off ceremony alang sa 2nd Special Forces ug reception ceremony alang sa mohulip kanila nga 47th  Infantry Battalion.

Gipasabot ni Lt. Gen. Vibar,  ang maong kausaban nga gipatuman sa Bohol walay kalabutan sa nanggawas nga report nga matud pa adunay impluwensiya sa maong troop movement ang militanteng grupo.

Gihagit ni Vivar ang mga walhong pundok nga mouban ug makighiusa kanila alang na sa kahapsay ug kalinaw nga ilahang gitinguha.

Ang 2nd Special Forces dul-an sa walo ka tuig nga nagpundo sa Bohol ug ibalhin sila sa Surigao, samtang ang hulip nila nga mao ang 4th Infantry Battalion gikan pa sa Negros Oriental.

Nasayran nga ang 2nd Special Forces dunay maayong record sa Bohol maong hagit ni Vivar ngadto sa 47th IB pinangulohan sa ilang Battalion Commander Col. Jose Dodje Belloga Jr. nga ipadayon ang  nasugdan sa SF.

Gipasalig usab sa Central Command nga ang ilang mga sundalo dili mga abusado ug dili mohimo og aksyon nga makadaot sa ilang imahe.

Si Col. Jose Dodje Belloga Jr., miingon nga dunay dul-an 500 ka mga sakop ang iyang batalyon ug dakong hagit kanila kun unsaon ang pagmentinar sa kalambuan sa probinsiya.

"New assignment ay challenge namin na nakikita dito is kung paano namin i-sustain yung mga gains na nagawa na ng province, yun ang pinakamalaking challenge namin kasi kami we have different missions sa Negros and pagdating namin sa Bohol is marami ng gains ang province,” asoy pa ni Belloga.

Si Bohol Governor Edgar Chatto sa iyang bahin naglaom nga kun unsa ang gihimong panaghiusa sa 2nd SF ngadto sa kagamhanan unta mao usab kini ang buhaton sa 47th IB.

"So, we look forward to stronger partnership and engagement with the new team," matud ni Chatto.

Hinuon, gihulagway sa Central Command nga dili problema ang insurgency sa lugar. (BANAT NEWS)