Statistics Day gisaulog

CEBU, Philippines - Gisaulog kagahapon ang ikaduha’ng tuig sa World's Statistics Day diin karong buwana usab ang ika-26 nga pagsaulog sa Statistics Month.

Nunot niini gihingusgan sa Philippine Statistics Authority, kanhi National Statistics Office, ang pag-awhag sa publiko nga magmatinud-anon sa paghatag sa impormasyon ngadto sa tig-survey.

Ang tema sa pagsaulog mao ang "Better Data, Better Lives".

Gitutukan sa ahensiya ang pagtabang sa Department of Health sa  paghatag sa gikinahanglang data alang sa mga programa sa panglawas.

Gikan sa tuig 2013, ang NSO nahimo na nga PSA human giusa kanila ang Bureau of Labor and Employment Statistics, Bureau of Agricultural Statistics ug National Statistics Coordination Board. (Decemay P. Padilla/GMR)  

 Lainlaing sector sa Mandaue naghiusa

Naghiusa ang lainlaing sektor sa dakbayan sa Mandaue aron modala sa ila’ng tingug sa ila’ng panginahanglan ngadto sa kagamhanan.

Ang pag-umol natigayon human sa usa ka adlaw nga panagtigum nga ila’ng gihimo sulod sa Mandaue City Sports and Cultural Complex sa niagi’ng adlaw.

Si Remelito Inopiquez ang nangulo sa panagtigum nga giapilan sa nagkadaiya’ng kahugpungan nga nagdala sa ila’ng tema nga “Sektoral maghiusa, kaayuhan, kalambuan makab-ot ta.”

Ang mga sektor gikan sa kababayen-an, mga batan-on, urban poor, mga drayber, LGBT, persons with disabilities ug mga senior citizens.

Ila’ng gipili ang mga opisyal kinsa si Joseph Jumantoc ang presidente ug si Maricar Cañete ang bise presidente, Jean Yamomo ang secretary-general ug Shirly delos Santos ang tresurera. (BANAT NEWS)