P2M alang sa hayupan

CEBU, Philippines - Nigahin ang Provincial Veterinary Office og P2 milyones alang sa vitamins, feeds ug antibiotics alang sa mga hayupan isip pagpangandam sa El Niño nga giingong molanat pa sa second quarter sa sunod tuig.

Si Dr. Mary Rose Vincoy, provincial veterinarian, nagkanayon nga ang mao’ng budget inisyal pa lang kini gikan sa disaster preparedness fund.

Ang mga logistics ipangapod-apod kini ngadto sa kalungsuran.

Gipasabot ni Vincoy nga kung mograbe ang kainit kinahanglan nga hatagan og vitamins ang kahayupan aron aduna’y resistensiya ug dili maluya.

Ang mga antibiotics pangandam kini alang sa hayupan nga masakit ilabi na kung moabot ang grabe’ng huwaw.

Gibutyag ni Vincoy nga niini’ng ulahi lang nanghatag sila og dextrose ngadto sa kalungsuran.

Ang mga dextrose gipundo kini panagana kung adunay hayupan nga masakit ug kritikal na ang kahimtang.

Matud ni Vincoy nga kasagaran nga sakit nga masinati sa hayupan kung sobra’ng init mao ang dehydration hinungdan nga kung dili pa moabot ang sobra’ng init, kinahanglang hatagan na og vitamins ang hayupan isip supplement.

Kasagaran sa hayupan nga makasinati og dehydration mao ang baboy ug manok.

Hinuon sa pagkakaron wala pa’y nadawat nga report ang PVO kabahin sa mga sakit-sakit sa kahayupan. (BANAT NEWS)