Red tide alert status padayun
CEBU, Philippines - Bisan og pipila ka buwan na ang nilabay human nitumaw ang red tide sa Dauis, Bohol, hangtud karon wala pa gihapon gilibkas sa Bureau of Fisheries and Aquatic Resources ang advisory.
Matud ni BFAR-7 Director Andres Bojos nga dili sila gusto nga mohatag og sayop nga impormasyon ug nipasabot nga dili dali mawala ang red tide.
Gihimug-atan sa BFAR nga tungod kay pabilin ang alert status, kini nagpasabot nga dili pa luwas ang pagkuha lakip na ang pagkaon og mga kinhason sa kadagatan sa Dauis.
Gihulagway ni Bojos nga importante gyud nga mabantayan sa mga local government units nga ang ila’ng kamerkaduhan dili masudlan og mga kinhason nga gikan sa mga lugar nga apektado sa red tide.
Gipasabot sa ahensiya nga daghan og hinungdan ngano’ng motumaw ang red tide sama sa kausaban sa temperatura, giparaton sa dagat ug dunay igo’ng organic load nga rason ngano’ng managhan ang red tide organisms.
Ang Department of Health-7 nipasabot na nga adunay dili maayo’ng epekto kun ang tawo makakaon og mga seafoods nga apektado sa red tide sama sa pagka-paralisar ug kun mograbe mahimo pa nga mamatay. (BANAT NEWS)
- Latest
