Upat ka priso nakaikyas

CEBU, Philippines - Upat ka mga priso sa kostudiya sa Bureau of Jail Management and Penology (BJMP) -Medellin District Jail  sa sitio Lutsa, Caputatan Sur, Medellin, ang nakaeskapo kagahapon sa kaadlawon.

Ang mga pugante mao sila si Alvic Arrabis Inot, taga barangay Pajo 2, Daanbantayan; Joselito Abrao Pantaleon, taga barangay Lamintak Sur, Medellin; Kim Flores Invento, taga barangay Dayhagon, Medellin; Kim Flores Invento taga barangay Dayhagon, Medellin.

Sumala pa nga pulos kaso sa ilegal nga drugas ang giatubang sa mga nakaikyas.

Matud pa ni Senior Police Officer 1 Winston Isnani, desk officer sa Medellin Police Station nga igo lang mipahibalo nila ang buhatan sa BJMP sa estasyon sa kapolisan nga gipugahan sila og upat ka piniriso.

Apan dihang ilang gipangutana kung unsang hitaboa nganong nakapuga ug giunsa sa pagpuga sa upat ka piniriso tak-om ang baba sa taga BJMP.

Apan giingnan sila nga nagpahigayon na og hot pursuit ang mga sakop sa BJMP aron masikop  pagbalik ang mga nakapuga nga piniriso.

Samtang usa ka lalaki nga nakapuga gikan sa Sogod Police Station niadtong Hulyo nadakpan sa kapolisan sa checkpoint sa barangay Damolog lungsod sa Sogod pasado alas 11 sa miaging buntag.

Ang pugante nga nadakpan mao si Jonalon Ebale, 25, nga nag-atubang og kasong paghupot ug pagbaligya og ginadiling drogas.

Pasado alas 11 nataymingan sa mga sakop sa Sogod Police Station kauban sa ilang hepe nga si Senior Inspector Rico Emperwa nga nagpahigayon og checkpoint ang suspek.

Siya nag-angkas sa usa ka motor ug dihang gipara na sila sa kapolisan nakit-an sa mga polis si Elabe kinsa namay-ongan dayon nga mao ang nakaeskapo niadtong Hulyo 10 ning tuiga.

Ang kaso ni Ebale nagpadayon pang gihusay sa sala ni Judge Jerry Dicdican sa Regional Trial Court Branch 25 sa dakbayan sa Danao. (BANAT NEWS)