Kalag-kalag gipangandaman na

CEBU, Philippines – Gipangandaman na sa kagamhanan sa dakbayan sa Sugbo ang umaabot adlaw sa kalag-kalag pagseguro sa seguridad sa tagsa-tagsa ka sementeryo sa dakbayan.

Lakip sa pagpangandam ang mga tanod sa barangay, Cebu City Police Office (CCPO) ug tanang sakop sa Police Coordinating and Advisory Council.

Matud ni Cebu City Disaster Risk Reduction Management Office head, Konsehal Dave Tumulak, nga sayo ang pagpangandam sa seguridad sa tanan sementeryo sa dakbayan.

Gilauman nga modagsa ang mga tawo nga buot mobisita sa ila’ng mahal sa kinabuhi sa adlaw sa Biyernes, Sabado ug Domingo tungod kay ang Nobiyembre 2 nga Lunes wala gideklarar nga holiday.

Tug-an pa ni Tumulak nga sugod sa Biyernes adunay mga tanod, emergency personnel, kapolisan ug uban pa nga ipakatap sa mga sementeryo sa dakbayan.

May mga CCTV cameras usab nga ipahimutang sa entrance, exit ug vicinity sa sementeryo aron pag-monitor sa kalihukan sa mga tawo.

Dugang niini ang mga portable toilets ug drinking stations.

Gipahimangnuan ni Tumulak ang katawhan nga gidili ang pag-parking sa sakyanan sulod sa 30 metros gikan sa sementeryo.

Samtang ang presidente sa Association of Barangay Councils, Kapitan Philip Zafra, nagkanayon nga adunay lima ngadto sa unom ka tanod ang ipangbutang sa nagkalain-laing barangays.

Pangulohan gihapon ni Tinago Kapitan Joel Garganera ang pagsuperbisar sa mga tanod isip representante sa ABC ngadto sa PCAC. – /GMR) (BANAT NEWS)