Cokaliong Shipping, naangol nga rescuer pasidunggan

CEBU, Philippines – Cokaliong Shipping Lines ug ang mga crew nga nitabang pagluwas sa 27 ka pasahero sa motorbanca nga nalunod hatagan og pasidungog sa kagamhanan sa Sugbo.

Kini tungod sa bayanihon nga gibuhat sa maong kompanya ug mao na kini ang ikaunom ka higayon nga nakatabang ang Cokaliong Shipping Lines sa mga katalagman sa kadagatan.

Matud ni Cebu City Acting Mayor Edgardo Labella nga makatarunganon lang nga pasidunggan ang Cokaliong Shipping Lines tungod niini.

Gikwestyon usab ni Labella kun nganong dili ang coast guard maoy unang nakaaksyon sa pag- rescue sa mga pasahero nga unta ila man kining trabaho.

Gawas sa Cokaliong Shipping Lines hatagan usab og pasidungog si Rudyard Payusan ang chief mate sa LCT Golden Crescent nga unang niresponde ug nitabang pagsalbar sa mga pasahero apan naputlan og tiil atol sa pagtabang kanila.

Gitinguha ni Labella nga adunay resolusyon sa paghatag og financial assistance kang Payusan ug paghatag og award niini kun dili kini supak sa “auditing rules.”

Samtang si Konsehal Alvin Dizon  ug Konsehal Nendell Hanz Abella adunay iduso nga resolusyon sa konseho karong adlawa aron paghatag og financial assistance ug pagtabang pagbayad sa bayranan sa tambalanan ni Payusan.

Nasuta usab ni Labella nga kadaghanan sa naluwas ni Payusan mga lumulupyo sa barangay Pasil sa dakbayan sa Sugbo.

Gilauman nga ihatag ang maong pasidungog dungan sa pagselebrar sa Charter Day sa Dakbayan sa Sugbo.

Makig-alayon ang Maritime Industry Authority (Marina) sa Philippine Coast Guard aron masumpo ang mga kolurom nga sakyanan sa dagat nga gihimong pasaheroan ug mobiyahe nga walay pagtugot bisan dautan ang panahon.

Kini human sa aksidente nga gikalambigitan sa MB Mansan nga nakasugat og disgrasya duol sa kadagatan sa Liloan niadtong adlaw nga Sabado apan swerte na lang nga naluwas ang 27 ka mga sakay niini.

Matud pa ni Atty. Jose Cabatingan, tigpamaba sa Marina- 7 kinahanglang masumpo na kini maong mga kolurom nga pasaheroan sa dagat.

Sumala pa ni Cabatingan, dunay daghan mga panagatan nga kargahan og mga isda, mga pagkaon gikan sa kadagatan, nga mobiyahe padulong dinhi sa Sugbo apan nagkarga diay kini og pasahero. – /EIM) (BANAT NEWS)