Kaso vs Madrigal pang-harass

CEBU, Philippines – Kanhi security consultant sa Kapitolyo ug pito ka deputized fishery wardens niawhag sa korte nga ibasura ang mga kasong gipasaka batok kanila sa duha ka mga kapitan sa duha ka commercial fishing boat tungod kay matud pa nila pagpangharas kini kanila.

Si kanhi capitol security head Loy Anthony Madrigal ug Rommel Lisaran pinaagi sa ilang abogado nga si Atty. Vincent Isles miduso kagahapon og motion to dismiss ug counter-affidavits diha sa Cebu Provincial Prosecutor.

Ilang kauban sila si Oscar Conje, Bobby Monterde, Onel Anislagon, Danilo Rosales, Junior Micarsos, Titing Rubio, Servidio Panares ug ilang abogado nga si Mary Joan Dulhao.

Sumala pa nila ang Strategic Lawsuits Against Public Participation (SLAPP) aron ibasura ang mga kasong gipasaka nila ni Rogelio Forrosuelo ug Donato Villaceran.

Ang mga gireklamo gikasohan og paglapas sa Presidential Decree 532 o Anti-Piracy and Anti-Highway Robbery Law of 1974, ug Article 267 sa Revised Penal Code, as amended, o kidnapping and serious illegal detention. Lakip sa gikasohan mao ang naila lang sa pangalang sila si Gilly ug laing tulo ka wala mailhing mga kauban.

Ang SLAPP na ang usa ka lakang diin dili hasion sa mga gikiha og kasong civil, criminal, o administrative cases ang si bisan kinsang tawo, institusyon o bisan unsang ahensya sa gobiyerno  ingon man  local government unit o ang mga opisyal ug kawani niini nga  naghimo lang sa ilang trabaho sama sa pagpatuman sa mga balaod sa kalikopan, proteksyon sa kalikopan ug ang pagpatigbabaw sa katungod sa kalikopan, aron lang sila  mahasol ug ma-pressure.  Sumala pa ni Dulhao ang grupo ni Madrigal nakasikop og 40 ka tawo nga naglakip nilang Forrosuelo ug Villaceran luwan sa A.C. and JSV, medium-scale commercial fishing boats samtang sila nanagat sa kadagatan sa Santa Fe sa Bantayan Island.

Dugang usab ni Dulhao nga unom sa siyam ka gipasakaan og kaso wala makakuyog sa maong joint seaborn patrol sa Bantay Dagat gikan San Remegio ug Daanbantayan, apan giapil sila og kiha.

“This is simple harassment to intimidate and is meant to scare them off. Wala sila’y sala kundi ang pagprotehir sa ilang dagat ug ilang panginabuhian,” matud pang Dulhao.

Ang mga nikiha kanila sumala pang Dulhao, nasakpang nakalapas sa Fisheries Code tungod sa paggamit og Danish seine o “hulbot-hulbot;” pagpanagat sud sa municipal waters; ug paggamit og pamaagi nga makaguba sa coral reefs. (Gikan sa The Freeman/EIM)