Mga pasangil batok BBL

CEBU, Philippines – Gihimakak sa duha ang gipakatap nga estoryang ang BBL maoy makapabuwag sa Mindanao gikan sa Pilipinas ug maiya na kini sa Malaysia tungod kay mao kini naghimo sa BBL. Bakak usab ang pasangil nga ang Bangsamoro police force nga dili sakop sa PNP; ang Bangsamoro ray makapahimulos sa ilang resources, mineral, lana.

Laing gipakatap nga akusasyon mao ang kabahin sa pagbaton og kaugalingong auditing body sa Bangsamoro ug pinaagi niini di makapanghilabot ang national government; pagbaton og kaugalingong bandila; kredo; kaugalingong gobiyerno; hudikatora; kaugalingong eleksyon ug ang matud pa pugson ang mga Kristiyano ug Lumad pagsunod sa mga patakaran sa mga Muslim .

Samtang nasagmuyo usab si Ferrer nga aduna pa gyuy naghimo-himo og estorya nga si Iqbal usa ka Malaysian bisan og walay basehanan.

Gamiton lang unya sa MILF ang pundo sa gobiyerno aron ipamalit og dugang mga armas aron mapadayon ang ilang ambisyon nga mabuwag ang Mindanao gikan sa Pilipinas ug uban pang mga pangdaot ug panglawgaw sa BBL.

Gituis ang unod

Si Ferrer mipasabot nga gituis sa mga supak sa BBL ang mga unod sa maong balaudnon mao nga negatibo na hinuon ang pagsabot sa katawhan.

Sumala pa ni Ferrer ang Bangsamoro police ubos gihapon sa pagdumala sa PNP ug dili tinuod nga gamiton lang sa pagpamalit og armas ang pundong gahin alang sa Bangsamoro.

Kini tungod kay mas kinahanglan sa Bangsamoro  nga molambo  ilang lugar aron makaapas sama sa  ubang probinsya.

Dili usab tinuod ang estorya nga dili makapanghilabot ang COA sa auditing. Giklaro usab sa duha nga dili hilabtan sa Bangsamoro ang tradisyon, kultura, pamaagi sa kinabuhi sa mga Kristiyano ug Lumad sa masakop unya nga lugar sa Bangsamoro.

Kalainan

Nakapangutana si Ferrer kun unsay kalainan sa mga Muslim nga gusto usab  makabaton og awtonomiya sama sa gihimo sa Caraga Autonomous Region ug sa uban pang rehiyon nga nagplanong mobarog usab sa ilang kaugalingong mga tiil.

Gipasabot sa duha nga ang BBL maoy tubag sa mga kakuwangon nga wala mahatag sa Autonomous Region in Muslim Mindanao (ARMM).

Laing kalainan niini mao nga ang ARMM nahimo na lang nga administrative region inay nga may awtonomiya hinungdan nga matag eleksyon, kadto lang gihapong mga political clans maoy pirmeng modaog. Apan sa BBL, ang tanang minoriya sud sa Bangsamoro adunay representasyon madato man o ma-pobre nga Lumad o Kristiyano.

Gipasalig nila nga way nalapas sa Konstitusyon ang BBL sukwahi sa gipagawas nga komento ug opinyon sa uban nga supak niini.

Tungod sa Mamasapano

Si Iqbal dihang gipangutana sa Banat News miangkon nga kun wala pa mahitabo ang Mamasapano diin 44 ka polis ug 18 ka MILF ang nakalas, dunay purohan nga napasar na ang BBL.

“We are not in control of the situation. It was the Mamasapano (insidente) that caused this to happen. But still the MILF will continue the path of peace,” matud pa ni Iqbal.

Usa sa giatubang nilang problema karon mao ang pirmeng way quorum sa Ubos Balaybalauranan aron tukion ang BBL samtang sa Senado, bugtong si Sen. Ferdinand “Bongbong” Marcos lang maoy nilihok sa bersyon niini nga matud pa 80 porsiyento sa orihinal nga BBL draft ang giusab. Sumala pang Iqbal, ang bersyon sa BBL ni Marcos mas bati pa itandi sa ARMM nga matud pa niya di gihapon makatabang pagsulbad sa problema sa Mindanao.

Matud pa ni Iqbal, sud sa 47 na ka tuig nagpadayon ang giyera sa Mindanao, ug 17 ka tuig nga gihimo ang negosasyon paghulma sa BBL ubos sa unom ka presidente ug onse ka peace advisors.

Apan nakasaway siya kang Sen. Marcos kinsa mipasangil nga daghang buslot ang BBL ug wa masubay sa Konstitusyon. Matud pa ni Iqbal daghang mga batid sa balaod ang nagtinabangay sud sa nakalabay nga 17 ka tuig paghulma niini.

Way salig sa mga Muslim

“Fear and bias attitude against Muslims and BBL hampers the passage,” matud pa niya, dugang sa paghangyo sa katawhan nga hatagan og kahigayonan nga makalawig ang maong balaudnon.

Hinuon bisan sa mga pagsupak, nalipay si Ferrer nga hinayhinay nang nasabtan sa kadaghanan sa mga Filipino sa benepisyo nga maangkon sa nasud sa BBL base sa resulta sa surveys human sa kutas kaayo nilang pag-esplikar sa katawhan bahin niini. (BANAT NEWS)