Demolisyon sa Englis wa nadayon

CEBU, Philippines – Wala nahinayon ang pagguba sa 46 ka panimalay sa sitio Esko, Englis, barangay Guadalupe, dakbayan sa Sugbo kagahapon human gihangyo sa kagamhanan sa dakbayan ang korte nga ipahunong ang pagguba kung wala pa’y kabalhinan ang mga biktima.

Si Bise Mayor Edgardo Labella kinsa mao’y nihangyo sa korte niingon nga nasabutan nila ni Lito Pahang, representante sa tag-iya sa luna uban sa mga apektado nga pamilya, nga moboluntaryo sila sa pagpahawa sa tapos sa Nobiyembre.

Ang pangulo sa Division of the Welfare for the Urban Poor (DWUP), Atty. Collin Rosell, nipasalig nga ipahiluna ang mga apektado sa barangay Quiot, Pardo isip ila’ng relokasyon.

Nipasalig usab si Mayor Michael Rama nga dili pasagdan sa kagamhanan ang mga apektado nga pamilya.

Tug-an pa ni Labella nga hatagan og financial assistance ang tagsa-tagsa ka pamilya nga maapektohan.

Base sa talaan sa Department of Social Welfare and Services, 41 ang houseowner, upat ang sharer ug duha ang renter.

Napulo ka balay ang giingong gidali-dali sa pagpaguba sa sheriff.

Si Kapitan Michael Gacasan nagkanayon nga magbutang sila og tulda alang sa mga pamilya nga nagguba ang ila’ng panimalay.

Matud ni Gacasan nga wala nakahibalo ang barangay labot sa demolisyon.

Samtang gihangop sa Englis Panagdait Homeowners Association nga wala mahinayon ang gikatakda unta’ng demolisyon sa ilang lugar.

Matud ni Susana Campo nga malipayon sila nga nagpatunga ang kadagkuan sa siyudad. - /GMR) (BANAT NEWS)