LTFRB moisyu na og special permits
CEBU, Philippines – Subay sa nagsingabot nga adlaw sa mga Santos ug Kalag, ang buhatan sa Land Transportation Franchising and Regulatory Board-7 nagsugod na pagpanawat og aplikasyon para sa mokuha og Special Permit para sa mga sakyanan ug bus nga gustong mobiyahe sa dili nila rota.
Matud pa ni LTFRB Regional Director Reynaldo Elnar, wala pay niduol kanila apan iyang gipahibalo nga bukas na silang modawat niini.
Sumala pa ni Elnar, magdala lamang og rehistro ug prangkisa ang mga tag-iya nga mokuha og special permits aron masiguro nga dili kolorum ang ilang mga sakyanang gamitong mamasahero.
Apan kinahanglan nga bisan og mahatagan sila og special permits sigurohon sa mga operators nga dili nila mabiyaan ang ilang naandang rota nga gibyahian.
Giawhag ni Elnar ngadto sa mga tawo nga dunay mga reklamo batok sa mga sakyanan o bus nga dili magpanuko sa pagtaho niini diha sa ilang buhatan aron ila kining mahatagan og dinalian nga pagtagad. - /EIM) (BANAT NEWS)
- Latest
