Nagkadaghan ang nagparehistro
CEBU, Philippines – Mokabat na sa 3,707 ang nagparehistro sa Commission on Election (COMELEC) sa tulo ka adlaw pa lang nila nga gihimong mall registration dinhi sa dakbayan sa Sugbo.
Base sa natala sa Comelec sa south district nga niadto lang adlaw nga Sabado 614 dayon ang nagparehistro samtang 447 sa north district.
Atol sa gipahigayon nga off site registration ngadto sa Robinsons Cybergate ang south district adunay nagparehistro nga 686 samtang sa north district 795 nga nagparehistro.
Kagahapong adlawa adunay 604 nga nagparehistro sa south district as of 4:30 sa hapon samtang 561 sa north district.
Matud ni Election Officer Marchel Sarno nabantayan nilang nagkadaghan ang mga nagparehistro samtang nagkaduol na ang deadline sa Oktubre 31.
Dugang pa ni Sarno nga sobra pa ngadto sa 750 nga average matag adlaw ang ilang naproseso human sa pagduso sa certificates of candidacies sa miaging semana.
Adunay walo ka data capturing computers nga gigamit sa dakbayan aron paspas ang pagproseso niini.
Matud pa ni Sarno, miabot na og 325 mil ang rehistradong botante sa south district ug 305 mil sa north district.
Magpadayon ang pagparehistro sa buhatan sa COMELEC kutob na lang karong Oktobre 24, tungod didto na kini nila himuon sa Cybergate sa petsa 25 hangtud sa 29 diha sa Ayala Mall ug balik na usab sa Cybergate ini og petsa 30 hangtud 31. - /EIM) (BANAT NEWS)
- Latest
