DOLE mag-inspeksyon sa mga kompaniya

CEBU, Philippines – Ang Department of Labor and Employment-7 magsugod na karon pagsusi sa tanang mga establisemento ug trabahoan sa Metro Cebu aron tan-awon kun nituman ba sa bag-ong minimum wage increase ang maong mga kompanya.

Nasayran nga P353 na ang bag-ong suholan dinhi sa Metro Cebu human naaprobahan ang P13  wage increase niadtong Oktubre 10.

Matud pa ni Dole 7 OIC-Regional Director Exequiel Sarcauga, ang ilang labor laws compliance officer mopahigayon og joint inspections kauban ang mga representante sa unyon ug sa kompanya.

Gustong ukayon sa DOLE-7 gikan mismo sa ilang mga trabahante kun nakadawat ba sila sa bag-ong suholan gikan sa ilang mga employers.

Kung ang kompaniya walay union, magpauban sila og representante sa mga trabahante nga moapil sa pagsusi kung sakto ba ang sweldo nga ilang nadawat.

Dugang pa ni Sarcauga nga tanang kompaniya nga nituman sa lagda  hatagan nila og certificate of compliance. Aduna nay mga kompanya nga nahatagan niini niadtong Septiyembre 26, 2014 gisundan kini niadtong December 22, 2014 ug karon tuiga dunay gihatagan human sa request sa mga kompaniya.

Si Sarcauga nipadayag nga nigamit sila karon og mga bag-ong pamaagi nga gitawag og labor compliance system diin magtagbo ang tanan aron matabangan ang kompaniya nga maka- comply sa ilang mga checklist pinaagi sa paglingkod sa representante sa DOLE, kompaniya ug labor representatives. - /EIM) (BANAT NEWS)