Panagatan nga gikostudiya gipangita

CEBU, Philippines – Usa ka demand letter ang gipadangat ngadto sa Kapitolyo gikan sa tag-iya sa usa ka fishing vessel nga gikustodiya sa Civil Security Unit ug sa Provincial Anti-Illegal Fishing Task Force nga giduma kaniadto ni kanhi Capitol Consultant Roy Madrigal .

Matud pa sukad pa niadtong Hulyo 26, 2014 ug hangtod karon wala pa kini ma-release.

Si Atty. Jonnah John Ungab, abogado ni Rolando Espinosa Jr. kinsa maoy tag-iya sa FB “Kezel Wayne” nipahibawo nga gi-dismiss na sa korte ang kaso nga gisang-at sa taga Talisay City Prosecutor’s Office nga illegal possession of firearms ug illegal drugs.

Kahinumdoman nga gisikop ang mga tripulante niini nga sila si Jake Perez ug Richard Leyson tungod sa paghupot og armas ug marijuana, apan na dismiss  ra ang maong kaso.

Hinungdan nga ang Talisay City Prosecutor’s Office nipagawas og release order sa maong panagatan ngadto sa task force.

Matud ni Ungab sa suwat, personal niya nga nahinabi ang kasamtangan nga Coordinator sa Provincial Anti-Illegal Fishing Task Force Atty. Chad Estella sa iyang buhatan niadtong Agosto 26, 2015.

Aron sa pag-follow up sa panagatan apan  gikatahong gihimakak ni Estella nga gi-turnover kanila ni Madrigal ang maong panagatan dihang mi-resign kini sa pwesto.

Giklaro ni Estella nga dunay proseso ilang gisunod sa pagkustodiya sa mga panagatan o butang nga ilang naembargo atol sa ilang mga operasyon.

Tungod niini, si Ungab gustong mangayo og official statement kung asa na ang panagatan sa iyang kliyente ug nibahad kining mopasaka sila og kaso kun di kini mabalik sa tag-iya tungod kay mao kini gisaligan sa ilang panginabuhian.

Si Madrigal atoa na karon sa gawas sa nasud human siya ni- resign sa Kapitolyo, apan nagtukod kini og grupo nga Guardian of the Seas, nagprotekta sa kadagatan pinaagi sa paggukod sa illegal fishing sa Sugbu. - /EIM) (BANAT NEWS)